د افغانستان لپاره د ملګرو ملتونو ځانګړی راپور ورکوونکی ریچارډ بېنېټ وایي، په افغانستان کې د بشري حقونو د وضعیت په اړه به خپل نوی راپور د ملګرو ملتونو د بشري حقونو د شورا ۵۵مې غونډې ته وړاندې کړي.
نوموړي که څه هم د ياد راپور د محتوا څرنګوالي په اړه څه نه دي ويلي، خو زياته کړې يې ده چې په دې راپور کې د افغانستان د بشري حقونو وضعيت انځور شوی دی.
د بېنېټ په خبره، په دې غونډه کې به د وړاندې کېدونکي راپور پر اساس په افغانستان کې د بشري حقونو د وضعيت په اړه د هېوادونو او مدني ټولنو استازو ترمنځ بحث او خبرې وشي.
هغه زیاته کړې: «ویلی شم دغه راپور، چې د افغانستان بشري وضعيت په کې انځور شوی، يادې شورا ته د راتلونکې پنجشنبې په ورځ د فبرورۍ په ۲۹مه وړاندې شي.»
د سیاسي چارو کارپوه زیارمل نازکمیر وايي: « هغوی د تعلیم او تحصیل، د ښوونځيو تړلو، همداراز د کار او دندو ځنډول او هغه ټول موضوعات چې دلته د بشر حقونو د اعلامیې خلاف ترسره کېږي او یا یې هغوی په افغانستان کې د بشر حقونو د اعلامیې خلاف بولي، تر ډېره به راپور په همدې موضوعګانو راڅرخي او همدا موضوعګانې به یې راخېستې وي.»
د اسلامي امارت ویاند ذبیخ الله مجاهد وایي، تېر ته په کتو د افغانستان لپاره د ملګرو ملتونو ځانګړی راپورورکونکی په خپل راپور کې ځيني موضوعات په لوی لاس غلط تعبیروي او په خبره يې له دې لارې غواړي، چې نړيوالې ټولنې ته د افغانستان ناسم انځور وړاندې کړي.
د مجاهد په خبره، په افغانستان کې د ښځو حقونه د شریعت په چوکاټ کې خوندې شوي او د ریچارډ بېنېټ اندېښنې او ادعاوې بې بنسټه دي.
مجاهد زیاته کړې:« ریچارډ بېنېټ چې کوم راپورونه خپاره کړي هغه په ډېرو کوچنیو موضوعګانو فوکس کوي او له لویو پرمختګونو د خلکو پام بلې خوا ته اړول غواړي. موږ به د دوی راپور ووینو؛ خو هر راپور چې وړاندې کېږي باید د افغانستان واقعیتونه او پرمختګونه په کې په نظر کې ونیول شي او د ټولنې له واقعیتونو او حالاتو سره سم وي؛ نو بیا یې په اړه ښه تصمیم هم نیول کېدای شي، همغږي او پرمختګ هم راتلی شي.»
دا به په روانه اوونۍ کې دویم ځل وي، چې د ملګرو ملتونو دوې مهمې ادارې د افغانستان پر وضعیت خبرې کوي.
د سیاسي او نړیوالو اړیکو کارپوهان وایي، د ښځو او نجونو په اړه باید حکومت په ځینو پرېکړو کې تغیر راولي، څو په خبره يې د نړۍ بهانې پای ومومي او رسمي تعاملاتو ته زمینه برابره شي.
د سیاسي چارو کارپوه محمد سلیم پیګیر وايي: « دا غونډې چې په هر ځای کې راپورونه وړاندې کوي، د افغانستان په درد نه خوري، د افغانستان خلک عمل ته منتظر دي چې باید د اسلامي امارت له لوري عملي ګامونه پورته شي نه د نړیوالې ټولنې له لوري.»
د نړيوالو اړیکو کارپوه نجیب الرحمن شمال وايي: « نړیوالې ټولنې یو ځل بیا د افغانستان موضوع ته پاملرنه کړې او غواړي چې د افغانستان سیاسي او ډیپلوماټيکې لارې بیا له نړیوالې ټولنې سره وصل کړي.»
دا په داسې حال کې ده، چې له دې مخکې هم د افغانستان لپاره د ملګرو ملتونو ځانګړی راپور ورکوونکي ریچارډ بېنېټ د دغه سازمان د بشري حقونو په څل۵۴ غونډه کې ویلي وو، چې په دې هېواد کې په یوه وروستي کال کې هدفي وژنې، د ښځو د حقونو تر پښو لاندې کېدل، د لږکیو د حقونو نقض او د بیان پر ازادۍ بندیزونه ډېر شوي دي.
خو اسلامي امارت د ریچارډ بېنېټ دا راپور یو اړخیز بللی او زیاته کړې يې وه، چې دا ډول څرګندونې د افغانستان د ټولنې د واقعیتونو خلاف دي.
