د افغانستان بشري حقونو په برخه کې د ملګرو ملتونو ځانګړي راپور ورکوونکي د بشري حقونو وضعيت په اړه خپل راپور د ملګرو ملتون عمومۍ اسمبلۍ ته وړاندې کړ.
بېنېټ په دې راپور کې د اسلامي امارت تګلارې د بشري حقونو پر زيان بللي او ويلي يې دي چې د يادو تګلارو له امله په افغانستان کې د بشري حقونو وضعيت ناوړه شوی دی.
بېنټ ویلي، د بشري حقونو د ناسم وضعيت ترڅنګ افغانستان له يو لړ ننګونو سره چې اقتصادي ناورين، مرګونې زلزلې او له ګاونډيو هېوادونو په زور د کډوال اېستل په کې شامل دي، مخ شوی دی.
نوموړي له دې سربېره یو وار بیا له زدهکړو د افغانو نجونو په محرومولو نیوکه کړې او زياتوي، سره له دې چې اسلامي امارت په وار وار د نجونو د زدهکړو بندیز لنډمهالی بللی، خو په خبره يې په دې برخه کې يې پرېکنده ګام نه دی اخیستی.
بنېټ زیاته کړې:« زه له تاسو غواړم، چې افغانستان د نړیوالې اجنډا په سر کې وساتئ. افغانان او افغان بنسټونه په تېره بیا افغان مېرمنو ته غوږ کېږدئ او ملاتړ یې وکړئ. دا ډاډمنه کړئ، چې د افغان مېرمنو او ځوانانو غږونه په ملي او نړیواله کچه اورېدل کېږي. وګورئ چې بشري حقونه چېرته قرار لري.»
خو اسلامي امارت د بېنېټ دا راپور له حقیقته لري او بې اساسه ګڼي او زیاتوي، د ښځو حقونه په افغانستان کې تامین شوي او دغه راز د زدهکړو او کار کولو ته د اجازې پر ورکولو هم کار روان دی.
د اسلامي امارت ویاند ذبیح الله مجاهد وايي:« د رېچارډ بېنېټ راپور یو لوريز او بې بنسټه دی، نوموړي په خپل ماموریت کې هم هڅه کړې چې دلته پروپاګند وکړي او ډېر کوچني موارد لوی کړي او پر اساس یې غلطې ادعاوې وکړي، اسلامي امارت دا ادعاوې ردوي. په افغانستان کې د خلکو حقوق تامین دی، د ښځو د زده کړو په برخه کې هم هڅې روانې دي چې زمینه یې مساعده شي نو دا کار به اسانه شي، له دې چا انکار نه دی کړی چې د زده کړو حق به نه ورکول کېږي. د کار په برخه کې هم ښځینه موږ سره د نظام په ګڼو برخو کې فعالیت لري، لکه روغتیايي، د ښوونې او روزنې، د پولیسو او پېژندپاڼو، پاسپورټ، هوايي ډګر او بېلابېلو نورو برخو کې په کار بوختې دي. هغه خوېندې چې تر اوسه له یو لړ ستونزو له امله ادارو ته نه دي حاضرې شوې هم یې په کورونو کې معاشونه ورکول کېږي.»
د سیاسي چارو کارپوهان بيا پر دې باور دي، چې اسلامي امارت دې بشرې حقونه په ځانګړې توګه د نجونو او مېرمنو دندو او زدهکړو ته اجازه ورکړي، څو په دې اړه د نړیوالو پلمې ختمې او رسمي تعامل ته لار خلاصه شي.
د نړیوالو اړیکو کارپوه نجیب الرحمن شمال وايي: « هڅې دې وشي چې پر افغانستان د نړیوالو ټولنو نیوکې کمې شي او تر دې زیات نور له ناورین سره مخ نه شي، که دا ټول مسایل حل نه شي افغانستان به نور هم د ناورین لور ته لاړ شي، نړیواله ټولنه او نور سازمانونه به هم رو رو افغانستان ته پاملرنه کمه کړي، چې په اوسنیو شرایطو کې دا کار د افغانستان د خلکو پر ګټه نه دی.»
دا په داسې حال کې ده، چې د ښځو د سولې او امنیت لپاره د جورج ټاون انسټېټوټ او د ناروې د سولې د څېړنو انسټېټیوټ له خوا د شویو ارزونو له مخې، افغانستان د ښځو د وضعیت په برخه کې د ۱۷۷ هېوادونو په نوملړ کې ترټولو وروستی ځای نیولی دی؛ ځکه د يادې ارزونې له مخې، ښځې په کې له خپلو اساسي حقونو محرومې شوې.
د دغه شاخص موندنې ښيي، چې په کومو ټولنو کې چې ښځې ښه حالت کې دي هلته ژوند هم په ډېر سولهییز ډول روان دی، ډیموکراتیک، سوکاله او د اقلیم د بدلون د اغیزو سره د بلدیدو لپاره په ښه ډول چمتو دي.
