د امريکا سولې انسټیټيوټ له راپور وروسته، چې سرپرست حکومت يې له سيمهييزو قدرتونو سره په تعامل بريالی بللی، چين په سياسي او اقتصادي برخو کې له افغانستانه د ملاتړ ډاډ تازه کړی.
ارګ د رئيسالوزرا سياسي مرستيال او په کابل کې د چين سفير ترمنځ د ليدنې خبر ورکړی او ويلي يې دي، چې دواړو خواوو د کابل او بيجينګ ترمنځ د سیاسي او اقتصادي اړیکو پر پیاوړتیا بحث کړی دی.
د ریاست الوزرا سیاسي مرستیال مولوي عبدالکبير ويلي، سرپرست حکومت د اقتصاد محوره بهرني سياست پرمخ وړلو له لارې په سيمهييزه او نړيواله کچه له هېوادونو سره د مثبتو اړيکو د لرلو هڅه کوي.
عبدالکبیر وايي: « اسلامي امارت په بېلابېلو برخو کې له چین سره د اړیکو او همکاریو پراختیا ته ژمن دی. موږ د اقتصاد محوره بهرني سیاست پر اساس غواړو په سيمهییزه کچه له ټولو هېوادونو سره مثبت سیاسي او اقتصادي تعاملات او اړیکې رامنځته کړو، څو د افغانستان او سیمې د اقتصادي پياوړتیا، ثبات او پراختیا لامل وګرځو.»
په ورته مهال په کابل کې د چین سفیر ژاوشینګ ویلي، بېجينګ د سرپرست حکومت په چارو کې د لاسوهنې پر ځای، په سياسي او اقتصادي برخو کې د کابل ملاتړ منطقي او مهم بولي.
ژاوشینګ زیاتوي: « موږ په خپل شپږ میاشتني ماموریت کې هڅه کړې، چې د افغانستان او چین اړیکې زیاتې پیاوړې کړو. چین د افغانستان په کورنیو چارو کې لاسوهنه نه کوي او په نړیوالو ناستو کې یې ټینګار کړی، چې باید د افغانستان له اوسني حکومت سره تعامل وشي.»
نوموړي دغه راز زياته کړې، چې هېواد يې افغان ځوانانو ته د طبابت په ګډون په ګڼو برخو کې تحصیلي بورسونه برابر کړي، د مس عینک کان په کېندنه کې يې پرمختګ کړی او دغه راز د ځڼغوځیو د پروسس او صادراتو په ګډون په مختلفو نورو برخو کې د چینایي پانګه والو پانګونې ښه پایله ورکړې ده.
د سیاسي چارو شنونکي دې ته په پام وایي، افغانستان د سیمې له هېوادونو سره د ښو اړیکو په ټینګولو سره کولی شي، د امنیت پیغام نړۍ ته خپور او د چین په شمول نور هېوادونه هم د افغانستان اقتصادي او سیاسي کړکېچ په مهارولو کې همکارۍ ته وهڅوي.
د سیاسي چارو شنونکی فیض محمد ځلاند وايي: « ګتې اخېستنې ته موږ باید د نړۍ نورو زبرځواکونو سره په همغږۍ داسې پانګونې ته لاره هواره کړو چې هغه پانګونه د افغانستان ملي ګتې د سیمې او نړۍ د زبرځواکونو په ګټه کې را ونغاړي.»
د سیاسي چارو شنونکی ادریس محمدي ځاځی وايي: « چین په سیمه کې تر ټولو غښتلی اقصتاد او باثباته سیاست درلودونکی هېواد دی. له چین سره د اسلامي امارت منظمه ډیپلوماسي چلول او د دوی اقتصاد او سیاست ته په پام سره ګام اخېستل کولی شي شته کشالو ته د حل لاره پیدا کړي او شته بندیزونو او کوم تبلیغات چې شوي دي او یا کېږي د هغې مخه ډب کړي.»
دا په داسې حال کې ده، چې له تېرو دوو اوونیو راپدېخوا افغانستان د ازبکستان، ایران او پاکستاني چارواکو د سفرونو کوربه و، چې د ناستو او ليدنو موخې یې د هر اړخیزو همکاریو پر سر مطلوبې پايلې ته رسېدل وو.
