وروسته له هغې چې د پاکستان پوځي رژیم د ګڼو بلوڅ ازادي غوښتونکو مشرانو نومونه د ترهګرۍ په لېست کې شامل کړل، د بښنې نړیوال سازمان یې په اړه تند غبرګون وښود.
سویلي اسیا لپاره د دې سازمان ادارې تازه په یوې اعلامیه کې دغه اقدام له دلیل پرته د مدني فعالانو د ځپنې خپلسری ګام بللی.
په اعلامیه کې پر بلوڅ مدني فعالانو بندیز او د ترهګرو په لیست کې د هغوی شاملول د بشري حقونو، شخصي حریم، مدني او د فعالیت ازادیو ته سپکاوی یاد کړی.
د اعلامیې یوه برخه:« هغه خپلسری اقدام چې له مخې یې د بلوڅ فعالانو په ګډون ځینې کسان د ترهګرو په لیست کې شامل شوي، پرته له دې چې د دغې پرېکړې د ننګولو فرصت ورکړل شي؛ د بشري حقونو، شخصي حریم، مدني او د فعالیت ازادیو ته سپکاوی دی.»
د بښنې نړیوال سازمان ویلي، د پاکستان پوځي رژیم له اوږدې مودې راهیسې له ترهګرۍ ضد قانون د وسلې په توګه کار اخیستی چې له زور په استفادې پرې مخالفې او ازادي پلوه مفکورې ځپي.
دې سازمان له یاد هېواد غوښتي چې دغه پرېکړه بېرته واخلي او خلکو ته د فعالیت او مشروع ازادیو ته د لاسرسي حق ورکړي.
د اعلامیې یوه برخه:« د بښنيې نړیوال سازمان له اوږدې مودې راهیسې په پاکستان کې د ترهګرۍ ضد قانون پر وړاندې خپلې اندېښنې شریکې کړي، ځکه دغه قانون د بشر حقونو نړیوالو سټنډردونو سره په ټکر کې دی، د دې اجازه ورکوي چې خلک له دلایلو پرته ونیول شي او یا د خپلو بشري حقونو د استفادې له کبله پرې بندیز وضع شي او د عادلانه محاکمې زمینه ورته نه برابروي. دغه قانون په منظم ډول د یوې وسلې په توګه د مخالفو نظرونو او نیوکو د ځپلو او د غږونو د چوپولو په موخه کارول شوی.»
د سیاسي چارو شنونکي هم د پاکستان پوځي رژیم دغه پرېکړه ننګوي او وايي، یاد هېواد له خپل ایجاد راهیسې تل مخالف غږونه په یوه او بله پلمه ځپلي او له صحنې یې لرې کړي.
دوی وايي، د دې هېواد پوځ چې په پاکستان کې د یو ټولواک په توګه عمل کوي او د سیاسي او پوځي دستګاه چارې یې په لاس کې اخیستي، نه یوازې په خیبرپښتونخواه او بلوچستان بلکې پخپله پاکستان کې هم د مخالفینو ځپلو ته دوام ورکوي.
د سیاسي چارو شنونکی معین ګل څمکنی وايي:« بلوڅان اوس نه بلکې له هغې ورځ چې د پاکستان په نوم هېواد رامنځته شو، په هماغه وخت کې دوی په دې باور نه وو چې پاکستان دې وي. دوی له هماغې ورځې د ازادۍ بښوونکې مبارزه شروع کړې او لا تر اوسه. نو که چیرې دوی دغه شان اقدامات کوي، دا به د دوی لپاره بهانه جوړوي چې مشرانو او ډلې یې وځپي او بله موخه نه لري.»
د سیاسي چارو شنونکی شهسوار سنګروال وايي:« زه فکر کوم چې دغه ډول د پاکستان حکومت تورونه چې پر خپلو مخالفینو یې لګوي، دا د نړیوالو قوانینو خلاف عمل دی او دا د مدني حقوقو خلاف عمل هم دی چې یو څوک دې خپل حق غواړي او هغه هم پر سوله ییزه بڼه، د ډېموکراسۍ په رڼا کې او بیا دې پرې دا ډول تورونه ولګول کېږي.»
دا داسې مهال ده چې د پاکستان پوځي رژیم د روانې اوکټوبر پر دویمه او ۱۶مه نېټه د بلوڅ ازادي غوښتونکو مشرانو او فعالینو په ګډون ۳۲ کسان چې ښځې هم په کې دي، د ترهګرۍ لیست کې شامل کړل.
په دې اساس پر یادو کسانو د ازادۍ او په عامه غونډو کې د فعالیت سخت بندیزونه لګېدلي چې له مخې یې دوی نه شي کولی له مشخص شویو سیمو ووځي او حکومتي چارواکو ته د دې حق ورکوي چې هرکله ترې څېړنې وکړي او د دوی او کورنیو مالي سرچینې ورکنګل کړي.
