د افغانستان بهرنیو چارو وزارت وايي،د ګاونډيو،سیمې او نړۍ ډېری هېوادونه دې ته لېواله دي،چې کابل کې خپلې سیاسي استازولۍ بېرته فعالې او رسمي راشه درشه ولري.
د یاد وزارت د ستراتیژیکو مطالعاتو مرکز مشر ولي الله شاهین وايي،د مالیزیا په ګډون پنځه داسې نور هېوادونه دي،چې د افغانستان نوی نظام به له ټولو وړاندې پر رسمیت وپیژني او اروپايي هېوادونه هم دې ته لېواله دي،چې په کابل کې خپل سفارتونه بېرته پرانیزي.
شاهین زیاته کړه:« مالیزیا او جمع پنځه نور هېوادونه هغوي عملآ پر دې باندې فکر کوي،چې څنګه د افغانستان اسلامي امارت پر رسمیت وپیژني او دلته خپلې سیاسي استازولۍفعالې کړي. سر بېره پردې اروپايي هېوادونه او زموږ ګاونډي هېوادونه د دې لېواله دي،چې څنګه دغه یخ بندان مات شي او دوی له افغانستان سره خپلې اړیکې په پوره سیاسي نورم باندې وغځوي.»
شاهین وايي،له دې وروسته به د افغانستان رسمیت پیژندنه زیات وخت ونه نیسي او په کابل کې به د ګڼو هېوادونو سیاسي استازولۍ په رسمي توګه فعالې شي.
خو سیاسي چارو شنونکي بیا په دې باور دي،چې نړۍ د رسمیت پیژندنې لپاره خپل معیارونه لري او ترهغې چې کابل دغه معیارونه پوره نه کړي،د افغانستان اقتصادي وضیعت به نور هم بحراني شي.
د ملي نهضت ګوند مشر سید اسحاق ګیلاني وايي:« نړۍ ځانته معیارونه لري او د هغو معیارونو د جوړولو لپاره حکومت ته ضرورت دی،چې هغه معیارونه پوره کړي. له دې پرته به د افغانستان په خلکو کې نوره لوږه او بدبختي زیاته شي.»
شااوخوا څلورنیمې میاشتې کېږي،چې اسلامي امارت واک ته رسیدلی او ټول نظام یې په لاس کې دی،خو تراوسه پورې نه کوم ګاونډی هېواد او نه هم د سیمې او نړۍ هېوادونه دې ته حاضر شوي،چې د افغانستان نوی نظام او حکومت پر رسمیت وپیژني او برعکس په دغې موده کې پر افغانستان نړیوال سیاسي او اقتصادي بندیزونه لګېدلي،چې له امله یې بشري بحران رامنځته شوی دی.
