په فرضي کرښه د اسلامي امارت ځواکونو له انتقامي بريدونو راهيسې، د پاکستان لوړ پوړو چارواکو د کابل پر وړاندې ادعاوو ته مخه کړې او تازه يې بهرنيو چارو وزير پارلمان ته ويلي چې د جګړې پرمهال يې په يوه ورځ د افغانستان بهرنيو چارو له وزير سره ۶ ځله ټليفوني خبرې کړې دي.
اسحاق ډار د خپلې ادعا له مخې د يادو اړيکو هدف نه دی روښانه کړی، خو د افغانستان بهرنيو چارو وزارت د متواترو اړيکو په اړه د نوموړي ادعا بې اساسه بولي.
دې وزارت ويلي، د وروستيو لانجو پرمهال اميرخان متقي له اسحاق ډار سره د ستونزې حل په موخه يوازې يو ځل ټليفوني خبرې کړې، نه هغسې لکه اسحاق ډار چې ويلي.
د بهرنیو چارو وزارت مرستیال ویاند احمدضیا تکل وايي: « د پاکستان بهرنیو چارو وزیر وروستۍ څرګندونې چې ګواکې د افغانستان اسلامي امارت د بهرنیو چارو وزیر محترم مولوي امیر خان متقي له نوموړي سره په یوه ورځ کي شپږ ځله اړیکه نیولې، له واقعیت څخه لرې دي. د حقیقت له مخې، د دواړو لورو تر منځ لومړۍ ټیلیفوني اړیکه د متقابل تفاهم او همغږۍ په چوکاټ کې ترسره شوې وه. په دې تماس کې ښاغلي اسحاق ډار له وضعیت څخه د ناخبرۍ څرګندونه کړې وه او ویلي یې وو چې د بشپړې خبرتیا وروسته به تماس نیسي.»
نوموړي د پاکستان لوړ پوړي ډېپلومات په توګه د اسحاقډار دا ډول څرګندونې د اړيکو په زيان بولي او د متقابل احترام په اړه يې د اسلامي امارت پر دريځ ټينګار کړی.
دې ستونزې ته د شنونکو پام هم ور اوښتی او له امله يې پاکستاني چارواکي بې ثباته ګڼلي. د دوی په خبره، پاکستاني چارواکي په ورته څرګندونو سره په لوی لاس د ستونزو زياتولو هڅه کوي.
د سیاسي چارو شنونکی توریالی ځاځی وايي: « دا خبرې که د هر پاکستاني له خوا کېږي، هڅه کوي خپل ځان ته برائت ورکړي او نړۍ ته وښيي چې له افغانستان سره خبرې کوي، خو افغانستان خبرو ته نه کېني، حال دا چې پاکستان د نړۍ له هغو درواغجنو او مکارو هېوادونو څخه دی چې نړۍ هم ورسره ستونزه لري.»
د چارو شنونکی واحد فقیري وايي: « دا خبرې د داخلي مصرف لپاره دی، ترڅو د خلکو اعتماد خپل کړي. خو افغانان باید په دې خبرو غلط نه شي او مذاکراتو ته ادامه ورکړي.»
ځينې نور بيا دا ډول څرګندونې د افغانستان په چارو کې د لاسوهنې په توګه تلقي کوي او له همدې امله له حکومت غواړي چې د پاکستان پر وړاندې په خپل دريځ کلک ودرېږي.
د سیاسي چارو شنونکی فیض محمد ځلاند وايي: « دا د ملامتۍ لوبه چې پاکستان په دې وروستیو کې پيل کړې، نه یوازې د پاکستان په ګټه نه ده بلکې سیمه نا امنه کوي. ښه به دا وي چې دواړه لوري پر حقایقو خبرې وکړي او پاکستان د افغانستان له ملامتولو لاس واخلي.»
د چارو شنونکی شهسوار سنګروال وايي: « زما په اند د دې ډول څرګندونو لامل یوازې توطئیه او دسیسې دي او غواړي د افغانانو ترمنځ بې باوري رامنځته کړي یا داسې اوازې خبري کړي چې اسلامي امارت لا هم پاکستان سره په تماس کې دی؛ خو وروستیو واقعیتونو دا وښودې چې دا هرڅه دروغ دي.»
له دې وړاندې د پاکستان دفاع وزير خواجه محمد اصف هم د افغانستان په اړه ځينې ګواښوونکې څرګندونې کړې وې، خو کابل يې څرګندونې د غبرګون وړ نه بولي او پر وړاندې يې بې تفاوتي غوره کړې. د بهرنيو چارو وزير په توګه د اسحاق ډار څرګندونو شنونکي اندېښمن کړې او وايي، ښايي د پاکستاني چارواکو ورته څرګندونې د خپل عادت له مخې لومړی او وروستی ځل نه وي.
