د افغان سولې لپاره د امریکا پخوانی ځانګړی استازی په نا اعلان شوي سفر کابل ته راغلی.
د افغانستان د بهرنیو چارو وزارت مرستیال ویاند کابل ته د زلمي خلیلزاد راتګ او د بهرنیو چارو له وزیر امیرخان متقي سره کتنه تایید کړې او وايي، دواړو لورو د کابل او واشنګټن ترمنځ د اړیکو پراختیا او ځینې نورو مهمو مسایلو په اړه خبرې کړې دي.
د بهرنیو چارو وزارت ویلي: « نن د افغانستان اسلامي امارت د بهرنیو چارو وزیر محترم مولوي امیر خان متقي سره د افغانستان لپاره د امریکا متحده ایالتونو پخواني ځانګړي استازي ښاغلي زلمي خلیلزاد وکتل. په دې غیررسمي ناسته کې د افغانستان او متحده ایالتونو د دوو اړخیزو اړیکو د پراختیا پر لارو چارو هر اړخیز بحثونه وشول.»
د بهرنیو چارو وزارت مرستیال ویاند د خلیلزاد لیدنه غیر رسمي بللې خو بحث شوي مسایل یې مهم یاد کړي دي.
خلیلزاد تر دې وړاندې واک ته د اسلامي امارت له رسېدو وروسته کابل ته دوه ځله رسمي سفرونو په لړ کې یو شمېر امریکایي اتباع په ګوانتنامو او د امریکا په نورو زندانونو کې له افغان بندیانو سره په تبادله کې ازاد کړي دي.
په ورته مهال، یو شمېر کارپوهان د واشنګټن او کابل اړیکو په رغېدو کې سربېره پر دې چې د منځګړو هېوادونو هڅې ستایي، د دا ډول سفرونو او د افغانستان په اړه د خلیلزاد اوسنی دریځ د دواړو هېوادونو لپاره ګټور بولي.
د سیاسي چارو شنونکی عزیز معارج وايي: « د امریکا د استازي په توګه د ډاکټر خلیلزاد راتګ او د اسلامي امارت له چارواکو سره یې کتنه، یو ښه ګام دی او د افغانستان او امریکا ترمنځ به ښې اړیکې جوړې کړي. خلیلزاد د افغانستان د مسایلو په تړاو کافي تجربه او ښه نظر لري، ځکه چې خپله هم افغان دی.»
د چارو شنونکی نجیب الرحمان شمال وايي: « لکه څرنګه چې موږ ولیدل، د افغانستان د سرپرست حکومت په تېرو څلورو کالو کې د امریکا په ګډون له نړۍ سره د ښو اړیکو غوښتنه کړې، نو له همدې امله د امریکا سره د اړیکو جوړېدل د افغانستان د ستونزو هواري لپاره مهم دي. همدې اهمیت ته په کتو د اسلامي امارت حکومت تل په کابل او واشنګټن کې د سفارتونو خلاصېدو غوښتنه کړې.»
د افغانستان لپاره د امریکا پخوانی ځانګړی استازی زلمی خلیلزاد داسې مهال کابل ته په سفر راغلی چې پرون سه شنبه هند په کابل کې د خپل سفارت رسمي چارې پیل کړې.
