د بهرنیو چارو وزیر امیرخان متقي، له هېواده بهر د افغانستان سیاسي استازولیو سره په کونړ کې له زلزلې وروسته زيانمنو هېوادوالو سره د کېدونکو مرستو په تړاو خبرې کړې دي.
د بهرنیو چارو وزیر ټولو ډېپلوماټیکو استازولیو ته سپارښتنه کړې چې د خپل ماموريت په هېوادونو کې حکومتي مسوولينو، خيريه بنسټونو او اهل خير وګړو ته له زلزلې وروسته د وضعيت په اړه معلومات وړاندې کړي.
د بهرنیو چارو وزارت مرستیال ویاند ضیا احمد تکل په دې اړه وايي: « د افغانستان اسلامي امارت د بهرنیو چارو وزیر، محترم مولوي امیرخان متقي، له هېواده بهر د افغانستان سیاسي استازولیو سره په کړنړ او څنګ لوريو ولايتونو کې له زلزلې وروسته زيانمنو هېوادوالو سره د کېدونکو مرستو په تړاو خبرې وکړې. د هېواد د بهرنیو چارو وزیر ټولو ډېپلوماټیکو استازولیو ته سپارښتنه وکړه چې د خپل ماموريت په هېوادونو کې حکومتي مسوولينو، خيريه بنسټونو او اهل خير وګړو ته له زلزلې وروسته د وضعيت په اړه معلومات وړاندې کړي او د مرستو رسولو، اړینو اسانتیاو او ښه مدیریت په برخه کې هڅې وکړي.»
همدارنګه د بهرنیو چارو وزیر د قطر دولت د بهرنیو چارو وزارت کې د نړیوالو همکاریو په چارو کې دولتې وزیرې مریم بنت علي ناصر المسند سره هم ټیلیفوني خبرې کړې دي.
بهرنیو چارو وزارت وايي، په دې مکالمه کې د قطر د دولت وزیرې د افغانستان کونړ او څیرمه ولایتونو کې د وروستۍ زلزلې او اوښتې مرګ ژوبلې له امله د قطر دولت د خواخوږۍ مراتب وړاندې کړل او د مرستې چمتوالی وښود.
