د افغانستان بهرنیو چارو وزارت د پاکستاني چارواکو هغه څرګندونې رد کړې چې ګڼې هند د افغانستان خاوره د پاکستان پر ضد کاروي.
بهرنیو چارو وزارت وايي، افغانستان به هېڅکله هم چا ته اجازه ورنه کړي چې د افغانستان خاوره د نورو هېوادونو پر ضد وکاروي.
بهرنیو چارو وزارت همداراز پر ملګرو ملتونو غږ کړی چې افغانستان کې د ترهګریزو کړنو او د پاکستان د ادعاو څېړنه وکړي.
بهرنیو چارو وزارت همداراز د پاکستان هغه ادعا رد کړه چې ګڼې ۲۰۱۷ م کال کې د فریدون خان مهمند په نوم د ننګرهار ولایت قومي مشر په پېښور ښار کې پر پوهنتون برید کې لاس درلود.
تېره ورځ پاکستاني چارواکو په یوې ناسته کې ادعا وکړه چې هند د افغانستان خاوره د پاکستان په ضد کاروي او هلته ترهګریز مرکزونه هم لري.
