له ایټالیا راغليو یوه ډله سیلانیانو د تېرې يوې اوونۍ په موده کې يې له کابل، غور، هرات او باميانو ولايتونو لېدنه کړې.
دوی وايي، افغانستان ته له راتګ وړاندې يې د دې هېواد په اړه په انټرنیټ کې جالب تاريخي او فرهنګي مالومات لوستي او له همدې کبله هڅېدلي چې افغانستان ته د تاريخي او فرهنګي واقعيتونو د لېدنې په موخه سياحتي سفر وکړي.
یو تن سیلاني لوکا وايي:« د افغانستان په اړه مې مالومات له انټرنیټ اخېستي دې او په اړه مې يې څېړنه هم کړې. د افغانستان تاريخ او جغرافيه مې څه نا څه لوستې. زما ملګري هم د افغانستان په اړه مالومات لري، ځکه يې د لېدو لپاره لېوال يو.»
دغه بهرني سېلانيان وايي، په بهر کې د افغانستان په اړه ناسم ذهنيت حاکم دی، خو پر وینا یې د تېرې يوې اوونۍ د سفر په ترڅ کې يې د افغاني ټولنې مثبت واقعيتونه په خپلو سترګو ليدلي دي.
یو تن سیلاني لوکا وايي:« ځيني ایټالويان لېواله دي چې افغانستان ته راشي. دا زما لومړنی سفر نه دی، دويم ځل مې دی چې افغانستان ته راځم. ځيني خلک غواړي، چې په افغانستان کې د واقعيتونو په اړه وپوهېږي.»
الېکساندر کاولتروک روسيالاصله ایټالوی دی او افغانستان ته يې له راتګ وړاندې د خلکو د چلن په اړه وېره لرله.
خو کاولتروک اوس وايي، د افغانستان د خلکو عاطفه او مينهناک چلن ژور درک کولی شي.
هغه زیاته کړه:« ما د افغانانو د مېلمهپالنې په اړه هم اورېدلي ول. ډېر خوښ يم،چې له څو ورځو راهيسي مې دا هر څه په خپلو سترګو ولېدل.»
ګرځندوی که څه هم د حکومتونو لپاره د عايداتي سرچينو يوه ده، خو ترڅنګ يې د ملتونو نږدېوالی، فرهنګي پوهاوی او متقابل درک هم زياتوي.
له ایټاليا راغلي دا سېلانيان هېله من دي، چې افغانستان ته د بهرنيو ګرځندویانو راتګ به نړۍ ته افغان ملت نور ور نږدې کړي.
سیلانۍ راضیه وايي:« هېله لرم، چې ورته سفرونه ملتونه سره نږدې کړي. ایټاليا ته د بېرته ګرځېدو په صورت کې به خلک وهڅوم، چې د سیل کول لپاره افغانستان ته ولاړ شي. دا یو پلان شوی سفر دی او موږ په کې انځورونه او وېډيوګانې اخېستي دي. په خپل اصلي هېواد ترکيې کې به هم خلک وهڅوم، ځکه موږ شريک دين او کلتور لرو. زه دلته داسې احساسوم، لکه خپل کور کې چې وم، ځکه ډېر رواجونه را ته اشنا دي.»
د اطلاعاتو او فرهنګ وزارت که څه هم کره شمېر نه دی ښودلی، خو څه موده وړاندې يې ويلي ول، چې افغانستان ته د بهرنيو سېلانيانو راتګ زيات شوی.
خلک غوښتنه کوي، چې حکومت دې بهرنيو سیلانيانو ته د افغانستان فرهنګي او تاريخي حقيقتونو په تړاو پوره مالومات ورکړي.
