د غزې روغتیایي چارواکو ویلي، اسرائیلي ځواکونو د دې ښار په شمال کې د کمال عدوان روغتون مشر نیولی.
د روغتیا نړیوال سازمان هم ویلي، د اسرائیلو دغه چاپه د دې روغتون د خدماتو ځنډېدو لامل شوې.
له دې وړاندې هم ګڼو هېوادونو اسرائيل په غزې کې پر جنګي جنایتونو او نسل وژنې تورن کړي. دې ته په پام د اسلامي امارت بهرنیو چارو وزارت هم د یوې خبرپاڼې په خپرولو سره دغلته د اسرائيلو اعمال غندلي او د دوی له لوري په غزې کې د کمال عُدوان پر ملکي روغتون بریدونه او د ياد روغتون د سوځولو، خدماتو بندولو، ناروغانو ایستلو او د طبي کار کوونکو سپکاوی د انساني نورمونو خلاف ياد کړی.
د خبرپاڼې یوه برخه:« د فلسطين غزې سیمه چې له ۱۴ نيمو مياشتو راهیسې د صهيونيستي رژيم تر ځمكنيو، هوايي او بحري بريدونو لاندې ده او ټول بنسټونه يې نږدې په بشپړه توګه ویجاړ شوې دي، اوس يې هغه محدود پاتې بنسټونه چې ځينې روغتيايي خدمتونه وړاندې کوي، د صهيونيستي اشغالګر رژیم له لوري په ارادي او پلاني ډول له منځه وړل کېږي.»
د بهرنیو چارو و زارت د نړۍ او سیمې پر زبرځواکو هېوادونو غږ کړی، چې د اسرائيلو ورته بريدونو مخنيوي او د فلسطین قضیې ته د یوې داسې دایمي حل لارې د را اېستلو لپاره بېړني او عملي اقدام وکړي چې د فلسطین خلکو ته د منلو وړ وي.
د خبرپاڼې یوه برخه:« اسلامي امارت یو ځل بیا د نړۍ او سيمې پر بانفوذه هېوادونو غږ کوي چې د دغو وحشتونو د عاجلي بندونې او د فلسطين قضيې ته د یوې داسي دايمي حل لارې د را ایستلو له پاره عاجل او عملي اقدام وکړي چې د فلسطين خلکو ته د منلو وړ وي. اشغالګر رژیم د روانې نسل وژنې پر دوام د جګړې ټول قوانين او اخلاقی معیارونه تر پښو لاندې کړې او د نړۍ د بانفوذه هېوادونو چوپتیا د اندېښنې وړ ده.»
د قطر لومړي وزیر او بهرنیو چارو وزیر محمد بن عبدالرحمن جاسم الثاني د شنبې پر ورځ په دوحه کې د حماس غورځنګ له یوه پلاوي سره کتلي او په غزې کې يې د جګړې پای ته رسولو لپاره یوه واضح او هر اړخیز اوربند ته پر رسېدو بحث کړی.
د سیاسي چارو کارپوهان په غزه کې روان جنګي جنایت د اندېښنې وړ بولي او له نړیوالو غواړي چې د غزې روان وضعیت ته جدي پام وکړي.
د سیاسي چارو کارپوه روح الله هوتک وايي:« په نړیواله ټولنه کې چوپتیا د سیاسي، اقتصادي او ستراتیژیکو ګټو پر اساس ده. د دې ستونزې حل لپاره نه یوازې د اسلامي هېوادونو یووالي ته اړتیا ده، بلکې د نړیوالو عامه افکارو د پراخ ملاتړ او فشار ته هم اړتیا لري. د بشري حقوقو لپاره د نړیوالو سازمانونو تقویه کول او د رسنیو منصفانه راپور هم کولی شي چې مثبت بدلون رامنځته کړي.»
پر غزې د اسرائیلو له لوري د جګړو او بمباریو له پیلېدو راهيسې دغلته ۴۵ زره او ۴۸۴ کسان ژوند له لاسه ورکړی له ۱۰۰ زرو زیات ټپیان شوې دي.
