د امریکا بهرنیو چارو وزیر انتوني بلېنکن او د قطر د بهرنیو چارو وزیر محمد بن عبدالرحمن آل ثاني تېره ورځ د خوندیتوب صلاحیت په نوم یو سند لاسلیک کړی، چې له مخې به یې قطر په افغانستان کې د امریکا د ګټو ساتنه کوي.
سند کې راغلي، چې قطر په افغانستان کې د امریکا د ګټو د ساتونکي رول لري او د واشنګټن او اسلامي امارت تر منځ به د اړیکو پر ټینګولو کې مرسته کوي.
د امریکا د بهرنیو چارو وزیر انتوني بلېنکن ویلي، قطر به په افغانستان کې د امریکا په سفارت کې د امریکا د ګټو یوه څانګه پرانېزي، چې ځانګړې کونسلي خدمات به وړاندې کوي او هم به په افغانستان کې د امریکا د ډیپلوماتیکي تاسیساتو امنیت او وضعیت څاري.
ویل کېږي، چې یاد تړون په ۲۰۲۲ کال کې د اجرا وړ دی او قطر به په افغانستان کې د خپل سفارت یو شمېر کار کوونکي د امریکا د کارونو لپاره ځانګړي کوي.
