Skip to content
د امریکا متحده ایالتو بهرنیو چارو وزیرر انټوني بلېنکن وایي، که اسلامي امارت غواړي نړیوال یې پر رسمیت ومني،نو باید خپله ستراتیژۍ کې اصلاحات راولي.
بلېنکن زیاته کړې:«که د کابل نوي واکمنان غواړي،چې پر رسمیت وپیژندل شي، نو دوی باید په خپله تګلاره کې اصلاحات راولي. زموږ په وړاندیزونو کې بشري حقونو ته درناوی، د خلکو آزادانه سفر،د غچ اخیستنې درول او له ترهګرۍ سره مبارزه شامل دي.»
له دې دوه ورځې وړاندې د روسیې د بهرنیو چارو وزیر سرګي لاوروف هم له اسلامي امارت غوښتي،چې د خپل حکومت جوړښت او کابینه پراخه کړي.
لاروف ویلي، د اسلامي امارت د رسمیت پيژندلو لپاره اوس وختي دی او په دې تړاو پرېکړه له وخت وړاندې ده.
خو اسلامي امارت بیا وایي، پر رسمیت پېژندل د افغانستان سربېره د ټولې نړۍ اړتیا ده او که دا تعامل ونه شي،پایلې به یې د ټولو لپاره بدې وې.
د اسلامي امارت د ویاند مرستیال انعام الله سمنګانی وايي:« افغانستان د نړیوالې ټولنې غړی دی،رسمي تعاملات د ټولو پر ګټه دي. د اسلامي امارت پر رسمیت پېژندل نه یوازې د افغانستان بلکې د ټولې نړۍ اړتیا ده او منفي پایلې به یې د ټولو پر زیان وي.»
د امریکا دبهرنیو چارو وزیر دغه راز ویلي، د۲۸۰ میلیونه ډالرو په آزادولو کې امریکا مهمه ونډه درلوده او دوی به راتلونکې کې هم د افغانستان اقتصاد ته نورې نغدې پیسې هم ورکړي،ترڅو عامو خلکو ته لا ډېرې پیسې ورسېږي.
د بلنکن په وینا دوی په داسې لارو چارو کار کوي،چې یادې پیسې د اسلامي امارت لاس ته ورنه شي.
پههمدې حال کې کارپوهان بیا ټینګار کوي،چې امریکا او اسلامي امارت دې له مناسبو او منځلارو چارو کار واخلي.
د سیاسي چارو کارپوه قریب الرحمن شهاب وايي:« د رسمیت پېژندنې په برخه کې لاهم د امریکا او طالبانو ترمنځ واټن شته دی. د امریکا د بهرنیو چارو وزیر څرګندونې په خپلو ژمنو ټینګار ده،چې ښي یو مشترک تعریف ته اړتیا شته ده.»
کارپوهان وایي، د امریکا متحده ایالتو او اسلامي امارت په تګلاره کې بدلون نه لېدل کېږي او لاهم یو د بل پر وړاندې په پخواني کلک دریځ ولاړ دي،چې زیات زیان یې عامو افغانانو ته رسېږي.
