د امریکا متحده ایالتو بهرنیو چارو وزیر انټوني بلېنکن په خپلو تازه څرګنددونو کې له واشنګټن سره د مخکیني ولسمشر محمد اشرف غني د ځینو هوکړو یادوونه کړې ده.
بلېنکن ویلي، غني ورسره پر هغه پلان هوکړه کړې وه،چې واک به د طالبانو پر مشرۍ یو ټول ګډونه حکومت ته سپاري،خو په وینا یې غني د دې هوکړې له عملي کېدو وړاندې له افغانستانه ووت.
بلېنکن زیاته کړه:« ما د شنبې پ شپه له ولسمشر غني سره پر ټیلیفون خبرې وکړې، پر هغه مې فشار راوړ،څو ډاډ ترلاسه کړم،چې هغه د طالبانو پر مشرۍ یوه نوي حکومت ته د واک د لېږد له هغه پلان سره موافق دی چې موږ یې د عملي کېدو هڅه کوو،هغه چې ټول ګډونه به وي او د افغان ټولنې ټول اړخونه به په کې شامل وي. هغه ما ته په ټیلیفون وویل،دی چمتو دی،خو که طالبان دا کار ونه کړي، د مرګ تر وخته ورسره جنګېږي، خو په سبا یې هغه له افغانستانه ووت. زه له ولسمشر غني سره له څو اوونیو او میاشتو راهیسې بوخت وم.»
اخوا د مخکیني ولسمشر سلاکار وزیر ضیالحق امرخیل بیا وايي، د جمهوریت سقوط کې پخوانۍ سیاسي څیرې او د وسله وال پوځ یو شمېر مشرانو هم لاس درلود.
امرخېل زیاته کړه:« د دې ترڅنګ د سقوط ځنې نور لاملونه موجود ول او دا د دې لامل شول،چې جمهورت سقوط وکړي. یو لامل یې دا وه،چې زموږ امنیتي او دفاعي ځواکونو متاسفانه له حده زیاته اتکاء یې پر بهرنیو ځواکونو وه. همدارنګه د سیاسيونو نه ژمنتیا، خودخواهي، د امنیتي ځواکونو په راس کې کومې څېرې وې، د هغو ضعف، مدیریت، له هېواد سره د نه لرل. دا ټول که سره راټول کړو، متاسفانه جمهوریت سقوط وکړ او طالب ته زمینه برابره شوه.»
امرخیل زیاتوي،یوازي یوه څېره نه شي کیدی،چي د جمهوریت د سقوط لامل شي،بلکي بهرنیان هم د جمهوریت په سقوط کي شامل دي.
د افغانستان د سولې لپاره د امریکا د بهرنیو چارو وزارت مخکېني استازي زلمي خلیلزاد هم په وروستۍ مرکه کې ویلي، دوی غوښتل واک په داسې ډول ولېږدوي،چې هېڅ بنسټ ونه نړېږي او تر څنګ یې د یوه ټول ګډونه حکومت جوړېدو ته لار خلاصه شي.
