په افغانستان کې د درېیو هېوادونو د سفارتونو د پرانیستې په تړاو د شمشاد له راپور شاوخوا دوې اوونۍ وروسته تازه، د بلومبرګ خپرونې هم دغه خبره تائید کړې او ویلي يې دي، چې ټاکل شوې په نږدې راتلونکي کې درې اروپايي هېوادونه په کابل کې خپل سفارتونه بېرته پرانیزي.
دې خپرونې د خپلو باخبره سرچینو په حواله په يوه راپور کې ویلي، د ایټالیا په ګډوڼ دغه درې هېوادونه په دې برخه کې پر غور کولو بوخت دي، چې په عملي کېدو سره به یې د سرپرست حکومت د ډېپلوماټیکې رسمیت پېژندنې پر لور مهم ګام وي.
د راپور یوه برخه:« د باخبره سرچینو په حواله په پام کې ده، چې ځینې اروپايي هېوادونه په افغانستان کې خپل سفارتونه له سره پرانېزي، چې دا به د کابل له سقوط شاوخوا درې کاله وروسته د طالبانو حکومت د ډېپلوماټیکې رسمیت پېژندنې پر لور یو ګام وي.»
دې خپرونې د ايټالیا بهرنیو چارو وزیر انټوني تیجاني له قوله دغه راز لیکلي، چې یاد هېواد د دې کار د ارزونې لپاره قطر کې د خپل سفیر په ګډون د حقیقت موندنې یو پلاوی افغانستان ته استولی دی.
نوموړي تېره اوونۍ په واشنګټن کې د ناټو د ۷۵مې کالیزې په مناسبت د جوړو شویو مراسمو په څنډه کې د سفارتي چارو د احتمالي بیا پیل او افغانستان ته د خپل یوخ پلاوي د لېږلو پخلی کړی و.
تیجاني زیاتوي:« موږ پر دې موضوع کار کوو. د دې ستونزې حل ستونزمن دی او یو څه وخت ته اړتیا لري.»
د دې ترڅنګ د اسپانیې بهرنیو چارو وزیر خوزي مانویل ا لبارز هم په ورته څرګندونو کې ویلي، هېواد يې لا وختي غوښتل خپلې سفارتي چارې په افغانستان کې له سره پيل کړي؛ خو په خبره یې د تېرې مې په ۱۷مه په بامیانو کې د داعش له لوري د اسپانیا د درېیو اتباعو وژل کېدو دغه چاره له ستونزو سره مخ کړه.
هغه زیاته کړې:« د امنیتي حالاتو له ژر تر ژره ښه کېدو سره به ، موږ خپل سفیر افغانستان ته بېرته ولېږو. موږ یوه مياشت وړاندې دې کار ته چمتو وو؛ خو له بده مرغه هغه مهال داعش په افغانستان کې زموږ درې اتباع راووژل.»
د سیاسي چارو شنونکي بیا د سیاسي او ډېپلوماټیک غیرنارمال وضعیت کې، د هېوادونو د سفارتي چارو بېرته پیلېدل له نړۍ سره د نېغ په نېغه اړیکو او د تعامل د بېرته پیل لپاره مهم ګام بولي.
د دوی په اند دغه چاره کولی شي د نړۍوالې ټولنې د یوه فعال غړي په توګه نړۍ ته وروپېژني چې ورسره ښايي په راتلونکي کې رسمیت پېژندنې لپاره اغېزناک تمام شي.
دا داسي مهال ده، چې د نړۍ هېڅ هېواد لا تر اوسه سرپرست حکومت په رسمیت نه دی پېژندلی؛ خو لا هم د روسیې، چین، ترکیې، ایران، متحده عرب اماراتو او پاکستان په ګډون تر ۱۶زیات هېوادونه افغانستان کي فعال سفارتونه لري او په بهر کې شاوخوا ۳۸ سیاسي ماموریتونه د هېواد د بهرنیو چارو وزارت له لوري اداره کیږي.
