بلخ ولایت کې سږکال د نورو کالونو پر پرتله پر زیاته اندازه ځمکه رومیان کرل شوي.
کروندګر وايي، تر نورو کالونو یې حاصلات هم ډېر دي، خو د د بیو ټیټوالي ته یې اندېښنه لري.
د رومیانو روب جوړولو کارخونو او معیاري سړخونو نه موجودیت، د کیمیاوي سرې ګرانښت، د کرنیزو درملو نه شتوالی او په بازار کې د بیو ټيټوالی هغه عوامل دي چې کروندګر يې له امله شکایت کوي.
د رومیانو کروندګر نیاز محمد وايي: « ښه حاصل لري، خو بازار نه لري. اوس یو کریټ رومي ۲۰۰ افغانۍ دي، خو ورځ تر بلې بیا دغه اندازه رومي تر ۱۰۰، ۱۲۰او ۸۰ افغانیو پورې را لوېږي. په دې بازار زموږ لګښتونه هم نه شي پوره کولی.»
د رومیانو یو بل کروندګر محمد نوید وايي: « له دولت غوښتنه کوو چې سړې خونې جوړې کړي، اصلاح شوي تخمونه ووېشي، بزګرانو سره همکاري وکړي او د روب جوړونې فابریکې جوړې کړي.»
د بلخ کرنې اوبو لګولو او مالدارۍ ریاست مسوولین که څه هم د دې کرنیز محصول بازار کمرنګي مني، خو یاده برخه کې د همکاریو ډاډ ورکوي.
د بلخ ولایت کرنې ریاست کې د ترویج مدیر محمد حسین عظیمي وايي: « بلخ ولایت کې هر کال له ۲ تر ۲ زره ۷۰۰ هکټاره ځمکه باندې رومیان کرل کېږي. د رومیانو حاصلات نوي پیل شوي او تر دې مهاله یې بازار ښه دی. هو! کله چې رومیان زیات شي بازار یې کمرنګه کېږي.»
مسوولین په یاده برخه کې پر سرپرست حکومت سربېره ملي سوداګر او پانګه وال هم مسوول ګڼي چې په خبره يې، که د روب جوړونې کارخونې جوړې کړي، دوی باور لري چې دغه حاصلات به ښه پایله ورکړي.
عظیمي په دې اړه وايي: « له سوداګرو مو غوښتنه ده چې د بزګرانو لاسنیوی وکړي، ترڅو موږ په بلخ کې د روب جوړونې کارخونه ولرو. له دې سره به اړتیا نه وي چې له بهرنيو بې کیفیته روب ګټه واخلو. ترهغو چې کارخانې نه وي، هم مو پیسې بېځایه مصرفېږي او هم مو د بزګرمحصولات پر وخت نه پلورل کېږي.»
کروند ګر ډاډ ورکوي، که سوداګر او پانګوال له دې حاصلاتو د ګټې اخیستلو لپاره ورته کارخونې جوړې کړي، په کور دننه به د رومیانو د استعمال برخه هم پر ځان بسیا شي.
