په يادو شنو خونو کې ډول ډول سبزي کرل کېږي،چې بيا د ژمي په موسم کې بازار ته وړاندې کېږي.
سيد حبيب رحيمي په مزارشريف ښار کې پر شنو خونو څه باندې لس مليونه افغانۍ پانګونه کړې ده.
رحیمي وايي، په يادو شنو خونو کې ۴۰ ښځې او ۲۰ تنه نارينه په کار بوخت دي او له دې لارې د خپلې کورنۍ نفقه برابروي.
رحيمي زیاته کړه:« له ۴۵ تر ۵۰ ورځو پورې موږ کار کوو،په خپله شنه خونه باندې، چې د بادرنګو فصل يې حاصل ته ورسېږي، له دې پرته ډول ډول سبزي لکه کاهو، تراتېزک، ګشنيز، رومي او نور هم لرو. هره ورځ ۶۰ کسان زما په شپږو شنو خونو کې پر کار بوخت وي،چې ۴۰ تنه يې ښځې دي او له دې لارې خپله نفقه برابروي.»
په ورته مهال بيا داسې کسان هم شته،چې د اقتصادي ستونزو له امله يې جوړې کړې شنې خونې د سقوط له ګواښ سره مخ دي.
کروندګر وايي، په بازار کې د شنو خونو د موادو بیې لوړې دي او له حکومته د لنډ مهالو او اوږدمهالو پورونو غوښتنه کوي.
د شنې خونې فارم لرونکی سيد علي وايي:« له دولته مو غوښتنه دا ده،چې موږ ته لږ پاملرنه وکړي،د شنو خونو د جوړولو د موادو په برابرېدو کې دې زموږ لاسنيوی وکړي.»
د شنې خونې فارم لرونکی چمن وايي:« له دولته غواړو،چې له موږ سره مرسته وکړي،اوږدمهاله او لنډمهاله پورونه دې راکړي، تر څو موږ وکولای شو،چې پر خپلو پښو ودرېږو، همدا زموږ د نفقې پيدا کولو لار ده.»
د بلخ کرنې رياست مشر مولوي شمس خالد وايي،له شنو خونو تر لاسه شوي حاصلات د قناعت وړ دي او زياتوي،چې له کروندګرو سره د هغوی د ستونزو د حل کولو برخه کې همکاري کوي.
خالد زیاته کړه:«موږ له خپلو مشرانو سره په دې کار کوو،چې څه ډول وکولای شو،دغه کروندګر پر ځان بسا شي. له موږ سره وزارت ژمنه کړې،چې ډېر ژر به نوی طرزاالعمل راولېږي او د هغې له مخې به کروندګرو سره مرستې وشي.»
د بلخ د کرنې رياست د مالوماتو له مخې، دمګړی په دغه ولايت کې له زرو ډېرې شنې خونې فعالې دي، چې هر کال مليونونه افغانۍ حاصل کوي.
مزارشريف کې د شنو خونو مالکين همدا راز د بازار موندنې برخه کې هم د حکومت د مرستې غوښتنه کوي.
