د ټرافیکي پېښو مخنیوي لپاره د مزار شريف- شبرغان او مزار شريف- حیرتان پر لویو لارو داسې چیک پاینټونه اچول شوي چې د موټرو سرعت کنټرولوي، ترڅو د ټرافیکې پېښو مخنیوی وشي.
د بلخ امنیتي چاواکي وايي، د مزار شريف- شبرغان او مزار شريف- حیرتان پر لويو لارو يې د تېز رفتاره موټرو د کنټرول لپاره ١٥ چیک پاینټونه فعاله کړي او ورسره د ټرافیکي پېښو کچه ۹۰ سلنه ټیټه شوې ده.
د بلخ د لويو لارو د ساتنې قوماندان ګلاب آغا وايي: « په تېره یوه میاشت کې د موټرو ترمنځ د ټکرونو کچه کمه شوې. د دې چیک پاینټونو تر جوړېدو مخکې هره ورځ دوه یا درې ټکرونه کېدل، مګر اوس په ټوله میاشت کې یوازې درې ټکره لرو. موږ د بلخ او حیرتانو پر سړکونو ۲۴ساعته چیک پاینټونه لرو.»
پرچیک پاینټونو ولاړ کسان وايي، د موټرو د سرعت کنټرولولو ترڅنګ، موټرچلوونکو ته سپارښتنې هم کوي، ترڅو د موټر چلولو پرمهال له احتیاط څخه کار واخلي.
د لویو لارو پولیس خیال زمان وايي: « موږ د دوی د امنیت لپاره ولاړ یو او پوښتنه ترې کوو. موږ له دوی غواړو چې په لویو لارو په کرار لاړ شي او سرعت کنټرول کړي. همدارنګه له دوی پوښتنه کوو چې آیا له چیک پاینټونو خو ناراض نه یاست، یا مو څوک نه په تکلیفوي، هغوی د رضایت ډاډ راکړی.»
د مزار شريف- شبرغان لویې لارې موټرچلونکي او مسافر د امنیتي چارواکو له دې اقدام هرکلی کوي او د مسافرو لاښه خونديتوب لپاره د یادو چیک پاینټونو زیاتوالی غواړي.
د مزار – شبرغان لویې لارې یو موټر چلوونکی وايي:« له جورجان مزارشریف ته روان یم. دا چیک پاینټونه د خلکو د امنیت لپاره دي او د موټرو د ډېر سرعت او ټکر مخنیوی کوي. له دې وړاندې پر دې لار ډېرې پېښې کېدې، خو اوس یو څه کنټرول شوې دي. دا چیک پاینټونه هم د امنیت او هم د ټکرو د مخینوي لپاره ښه دي، موږ له اسلامي امارت خوشاله یو.»
د لویې لارې یو تن مسافر وايي: « د سړکونو امنیت ښه شوی، چیک پاینټونه او کمربندونه اچول شوي او موټر نه پرېږدي چې سرعت ډېر کړي. له دې امله پېښې هم ډېرې کمې شوې دي.»
د مزار شريف- شبرغان او مزار شريف- حیرتان لارې د هېواد په شمال کې یو له هغو خونړیو لارو بلل کېدې چې نږدې هره ورځ به په کې د ټرافیکي پېښو له امله خلکو ته مرګ ژوبله اوښته.
د بلخ ټرافیکو مدیریت د مالوماتو له مخې، روان کال پر يادو لارو ۱۲۴ ټرافیکي پېښې شوې چې په کې ۱۲۳کسانو ژوند بايللی او ۱۷۷ نور ژوبل شوې دي.
