د شمال زون د غالیو ټولنې چارواکي وايي، د روان کال په لومړیو شپږو میاشتو کې پنځه سوه زره متره افغاني غالۍ او لمڅي بهرنیو هېوادونو ته صادر شوي چې د تېر کال په پرتله لس سلنه زیاتوالی ښیي.
د دې ټولنې چارواکي زیاتوي، افغاني غالۍ اوس مهال د نړۍ شاوخوا ۳۵ هېوادونو ته صادریږي.
د دوی په خبره، په لاس اوبدل کېدونکو افغاني غالیو شهرت بر روان دی او د نړۍ په کچه يې غوښتنې ورځ تر بلې زیاتیږي.
شمال زون کې د غالیو اتحاديې مشر عبادالدین محمدي وايي: « موږ پخوا تر ۹۵ سلنو پورې صادرات پاکستان ته لرل، خو اوس د پاکستان بدیلې لارې پيدا شوې او افغانستان دا مهال د اروپا او امریکا په ګډون نړۍ ۳۵ هېوادونو ته غالۍ صادروي. موږ روان کال د تېر کال په پرتله صادراتو کې ۱۰ سلنه زیاتوالی لرو چې ډېره برخه یې له حیرتان، آقینې او اسلام کلا بندرونو صادرېږي.»
په ورته مهال، مزارشريف ښار کې د وطني غالیو پلورونکي وايي، دې وروستیو کې په افغاني غالیو د نړیوالو بازارونو باور زیات شوی او دغې چارې له هېواده د غالیو پر صادراتو مثبت اغېز کړی.
د غالیو سوداګر زیاتوي، افغاني غالیو په نړیوالو نندارتونونو کې خاص ځای موندلی چې ورسره به نه یوازې په هېواد کې دودیز صنعت لا وغوړېږي بلکې زیاتو کسانو ته به د پانګونې او روزګار زمینه هم برابره شي.
غالۍ پلورونکی حفيظ الله سادات وايي: « افغانانو په پاکستان او ایران کې هم د دې هېواد وګړو ته د غالیو اوبدل ور زده کړي او اوس له هغوی سره سالم رقابت لرو. دا ډېر ښه تجارتي صنف دی.»
غالۍ پلورونکی ګل رحمان رحماني وايي: « فروشات مو د تېر کال په پرتله ښه شوي او زموږ غالیو نورو هېوادونو ته لاره پیدا کړي، ان تر اروپا او امریکا رسېدلې دي.»
په ورته مهال، د بلخ صنعت او سوداګرۍ ریاست مسوولین وایي، په دې ولایت کې د غالیو صنعت ورځ تر بلې وده کوي.
مسوولین زیاتوي، پخوا به په هېواد کې تولیدېدونکې غالۍ د وینځلو او پروسېس لپاره بهرنیو هېوادونو ته استول کېدې، خو اوس یوازې په مزار شریف کې شاوخوا دېرش کارخونې جوړې شوې چې غالۍ په کې تر پروسېس او بسته بندې وروسته صادریږي.
د بلخ صنعت او سوداګرۍ ریاست مرستیال نصیر احمد نیازی وايي: « د غالیو د صادراتو لپاره د اسانتیاوو برابرول د صنعت او سوداګرۍ ریاست له مهمو لومړیتوبونو څخه دي. دا ریاست له ټولو مسوولو ادارو سره په ګډه هڅه کوي چې د غالیو صادروونکو ته شفاف مکانېزمونه او اداري همکاري رامنځته کړي، ترڅو د هېواد ملي تولیدات لا ډېرو بهرنیو بازارونو ته ورسېږي.»
په افغانستان کې د غالیو د تولید او صادراتو د زیاتوالي دا بحث داسې مهال کېږي چې همدا دوه ورځې وړاندې د ترکیی په استانبول ښار کې افغاني غالیو په جوړ شوي نړیوال نندارتون کې د ۱۹هېوادونو ترمنځ لومړې مقام خپل کړ.
د معلوماتو له مخې، د غالیو صنعت په افغانستان کې شاوخوا دوه زره کاله تاریخي مخینه لري او دا مهال په ټول هېواد کې څه باندې یو میلیون کسان د غالیو په اوبدلو، پروسېس او سوداګرۍ بوخت دي.
