احمد شاه له نن شاوخوا دوه میاشتې وړاندې د مزار شریف ښار څلورمې ناحیې اړوند سیمه کې له ښوونځي کور ته د تګ پر مهال د ناپېژانده کسانو له خوا تښتول شوی و.
امنیتي ځواکونو یې له ورکېدو سره هم مهاله د پیدا کولو هڅې پيل کړې او دا دی اوس يې خپلې کورنۍ ته وسپاره.
مسوولین واي، د احمدشاه ژغورولو په مهال وسله واله نښته هم رامنځته شوې چې اختطاف کوونکي په کې وژل شوي.
د بلخ ولایت مقام ویاند عطاالله زید وايي: « نن سهار د بلخ ولایت د استخباراتو ریاست د بلخ زون ۸۸۸ ملي قطعې او د استخباراتو مرکزي لوی ریاست د مجاهدینو په ګډو عملیاتو کې چې د بلخ والي صاحب یې مشري او تعقیب پرغاړه درلود، د بلخ ولایت مزار ښار څلورمې حوزې اړوند سلیم چهاراهي سیمه کې یو ماشوم د برمته کوونکو له منګلو آزاد کړ. اختطاف ګرانو مقاومت پیل کړ، خو ټول له منځه یوړل شول او ماشوم خپلې کورنۍ ته وسپارل شو.»
دا تنکی ماشوم چې نږدې دوه میاشتې د مرګ او ژوند پر پوله ولاړ و، له وېرې او اندېښنو ډک ژوند په مخه کړی و او دومره وېرېدلی چې هېڅ نه شي ویلی.
خپلوان یې د بېرته پيداکېدو شېبې د ځان او کورنۍ لپاره لویه خوشالي بولي.
د احمدشاه تره حیات الله وايي: « احمدشاه جان د ثور په ۲۱ مه باندې له مکتب نه راځي د کور مخې سره اختطاف چیانو له دې ځایه پورته کړی و. دغه ناپېژانده کسانو څو ورځې وروسته بیا په تماس کې شول مسیجونه یې کول، داسې معلوم څه یې نه غوښتل خو ویل یې تاسو مو هرڅه خرڅ کړئ. موږ سره حکومت د ماشوم په پیدا کولو کې ډېر کوشش وکړ چې نن الحمدالله ماشوم آزاد شو.»
احمد شاه یوازې نه دی، بلکې بلخ ولایت کې لسګونه نور ماشومان او افراد هم د انسان تښتوونکو له منګلو آزاد شوي دي چې یوه بېلګه یې له نن شاوخوا درې کاله وړاندې د ۹ کلن عبدالروف آزادي ده.
