د افغانستان برېښنا شرکت وايي، د دې شرکت عمومي اجراییوي رییس ملاعبدالحق همکار ایران ته د یوه پلاوي په مشرۍ سفر کې له ایران څخه د وارداتي برېښنا تړون د راتلونکې ۱۴۰۵ لمریز کال لپاره تمدید او لاسلیک کړی.
د افغانستان برېښنا شرکت ویاند محمد صادق حق پرست وايي: « د افغانستان برېښنا شرکت عمومي اجراییوي رییس ملا عبدالحق همکار په مشرۍ، د ایران اسلامي جمهوري هېواد ته تللي پلاوي له ایراني لوري سره د ۱۴۰۵ لمریز کال لپاره د برېښنا پېرلو غځونې تړون لاسلیک کړ. یاد پلاوي د ایران اسلامي جمهوري هېواد د برېښنا مدیریت او وېش – توانیر شرکت بلنې له مخې، د افغانستان برېښنا شرکت عمومي اجراییوي رییس په مشرۍ لوړ پوړی پلاوي ایران هېواد ته سفر کړی و.»
د برېښنا شرکت د چارواکو په خبره، دغه پلاوی د ایران د برېښنا او انرژۍ د لېږد او وېش اړوند مدیریتي شرکت په بلنه یاد هېواد ته سفر کړی و او له ایران څخه یې افغانستان ته د برېښنا لېږدولو اړوند زېربناوو د پراختیا پر څرنګوالي خبرې کړې دي.
د افغانستان برېښنا شرکت ویاند محمد صادق حق پرست وايي: « د افغانستان برېښنا شرکت رهبرۍ په مشرۍ یاد پلاوي د ایران هېواد پلازمېنې تهران کې د برېښنا انرژۍ لېږد بنسټونو پراختیا، له دې هېواد څخه افغانستان ته د وارداتي برېښنا پېرودلو په تړاو د ګډو دوه اړخیزه همکاریو ناسته کې پر ګڼو اړخونو له ایراني لوري سره هر اړخیزې خبرې وکړې.»
د افغانستان برېښنا شرکت چارواکي دغه راز وايي، هڅه کوي له دې ډول لیدونو څخه د برېښنا صادروونکو هېوادونو سره د برېښنا د واردولو په تړاو خبرې وکړې، ترڅو خلکو ته د لا هوسا ژوند امکانات برابر شي.
