د نورستان د برګمټال ولسوالۍ په اوله ګل کلي کې چې وروستیو خونړیو سېلابونو یې ګڼ کورونه ویجاړ او لسګونه کورنۍ یې بېکوره کړې دي، له ۱۹۲ سېلابځپلو کورنیو سره د غیرخوراکي توکو مرسته وشوه.
د کډوالۍ نړیوال سازمان(IOM) استازی وايي، دا مرستې د پېښو پر وړاندې مبارزې چمتووالي ریاست په همغږۍ د کډوالو نړیوال سازمان، یونیسف، د ماشوم ساتنې او پيیو-اېمای(PU-Mi) موسسو له لوري برابرې او مستحقو کورنیو ته ووېشل شوې.
د کډوالۍ نړیوال سازمان استازی ذبیح الله امین وايي: « د آیاواېم له خوا هرې یوې کورنۍ ته یوه ستره فامیلې خېمه ورکول کېږي؛ همدارنګه د کمپلو کېټ، سولر سیسټم او ژمنۍ البسه ورکول کېږي. د یونیسف له خوا فامیلې کېټ او د پاکۍ ساتلو کېټ ورکول کېږي. د ماشوم ساتنې ادارې له خوا د کور جوړونې کېټ او د پيیو- اېمای له خوا د سېلابي کېټ په نوم توکي ورکول کېږي.»
بله خوا، مرستې ترلاسه کوونکې کورنۍ د ولایتي ادارې او مرستندویه ادارو له یادو مرستو خوښيي څرګندوي، خو ټینګار کوي چې شوې مرستې د دوی د ټولو اړتیاوو د پوره کولو لپاره بسنه نه کوي او باید په نورو برخو کې هم ورسره مرسته وشي.
د سېلابځپلې کورنۍ غړی نعمت الله وايي: « موږ د دې مرستو مننه کوو. له دولت او موسسو تمه لرو چې لا ډېرې مرستې وکړي.»
د برګمټال ولسوال رفیع الله امین وايي: « د خلکو بنیادي اړتیاوې لا نه دي پوره شوي، موږ کور او سرپناه ته اړتیا لرو.»
په ورته مهال، د نورستان ولایتي ادارې مسوولان وایي، له اړوندو ادارو سره یې د سېلابځپلو کورنیو د نورو اړتیاوو په اړه خبرې روانې دي چې ډېر ژر به ورته نورې بشري مرستې چمتو کړي.
د نورستان د ولایتي ادارې ویاند فریدون صمیم وايي: « راتلونکي کې به د خوراکي توکو ترڅنګ، نورو اړینو برخو کې هم د دوی مرسته وشي. د نورستان والي له اړوند ارګانونو او موسسو سره خبرې کړې او هڅه کوو د دوی لپاره نورې اړینې مرستې جلب کړي.»
په نورستان کې وروستیو سېلابونو لسګونو کسانو ته د مرګ ژوبلې اړولو ترڅنګ، سلګونه کورنۍ له اقتصادي پلوه سختې زیانمنې کړې چې اوسمهال بېړنیو بشري مرستو ته اړتیا لري.
