د نورستان مرستیال والي، د یو شمېر سیمهییزو ادارو د مسوولینو په ملتیا، د برګمټال ولسوالۍ د اوله ګل سیمې ته د سفر پر مهال ویلي چې وروستیو سېلابونو په دې ساحه کې پراخ ویجاړی کړی او د خلکو شخصي او عامه شتمنیو ته زیان اړولی.
د نوموړي په خبره، په دې طبیعي پېښه کې د ۱۷۰ کورونو ترڅنګ، څلور ژرندې او دوه پلونه ویجاړ شوي، جوماتونه، ښوونځي، سړکونه او نور عامه تاسیسات هم زیانمن شوي دي.
مسوولین زیاتوي، سېلاب ځپلو سره د مرستو په موخه له اړوندو ادارو او خیریه موسسو سره خبرې شوې او لازمې مرستې به ورسره وشي.
د نورستان مرستیال والي فیصل مختار وايي: « دغو سېلابونو ۱۷۰ کورونه، ۴ ژرندې او دوه لوی پلونه په بشپړه توګه تخریب کړي. همدارنګه ګڼ ښوونځي، جوماتونه او نور عامه ځایونه هم تخریب شوي. د دې سېلاب زیانونه د پارون له زیانونو هم ډېر دي.»
د سیمې اوسېدونکي له مرستندویه ادارو غوښتنه کوي چې د دوی د ستونزو حل لپاره ژر تر ژره بېړنۍ مرستې برابرې کړي.
ځايي اوسېدونکي وايي، د کورونو او عامه تاسیساتو ویجاړېدل د دوی ورځنی ژوند له جدي ستونزو سره مخ کړی او د لومړنیو اړتیاوو برابرولو لپاره مرستو ته اړتیا لري.
د سېلابونو له امله یو تن زیانمن شوی کس وايي: « زموږ په کورونو کې چې څه شی وو، که خوراکي توکي وو، که پيسې او مالونه، هرڅه لاندې شوي او موږ له یو جوړ جامو او څپلیو سره تښتېدلي یو. زموږ خلک له ډېرو ستونزو سره مخ دي.»
یو بل سېلاب ځپلی کس وايي: « موږ د اسلامي امارت له مشرانو غوښتنه کوو چې زموږ حالت ته پاملرنه وکړي. همدارنګه له خیریه بنسټونو هم هیله لرو چې راشي او د خلکو مرسته وکړي.»
د سېلابونو له امله د زیانمن شویوځايي اوسېدونکو غوښتنې داسې مهال دي چې تېره اوونۍ د سېلابونو له امله په برګمټال ولسوالۍ کې د کورونو، مواصلاتي لارو او عامه تاسیساتو د زیانمنېدو له کبله، د خلکو ژوند د عادي کېدو لپاره بېړنۍ مرستې اړینې بلل کېږي.
باید یاده شي چې تر دې وړاندې هم د نورستان مرکز پارون کې سېلابونو خلکو ته د سر او مال درانه زیانونه واړول.
