د کورنیو چارو پر سرپرست خلیفه سراج الدین حقاني باندې د امریکا لخوا د ۱۰ میلیونو ډالره جایزې لرې کولو او د افغانستان له زندانونو د دوو امریکایي اتباعو له خوشې کیدو وروسته، دې متقابل عمل د کابل او واشنګټن ترمنځ پر سياسي اړيکو او تعامل کې نوې خوشبيني رامنځته کړه.
خو د امریکا د بهرنیو چارو وزارت ویاندې ټیمي بروس یوې خبري ناسته کې ویلي، د اسلامي امارت د چارواکو په اړه یې د هېواد نظر نه دی بدل شوی او پر يو شمېر چارواکو د جایزو لرې کول د سرپرست حکومت لپاره د امتیازاتو ورکولو په مانا نه دي.
بروس زیاته کړې:« په دې مساله کې د امریکا پالیسي هیڅ بدلون نه دی کړی. زه فکر کوم چې دا اصلي مساله ده او په دې برخه کې هیڅ بدلون نه دی راغلی.»
د سیاسي چارو کارپوهان وايي، د دواړو هېوادونو ترمنځ د سیاسي اړیکو د ښه کولو لپاره، بايد سرپرست حکومت د افغانانو او نړیوالې ټولنې مشروع غوښتنې ومني.
دوی زیاتوي، امریکا د اسلامي امارت پر وړاندې د فشار راوړلو پالیسي کاروي او د افغانستان د سرپرست حکومت پر رسميت نه پیژندلو سربېره يې پرې پراخ بندیزونه لګولې دي.
د سیاسي چارو کارپوه سمیر انګار وايي:« امریکا د اسلامي امارت پر وړاندې د فشار سیاست غوره کړی دی. د افغان ولس شتمني یې تر اوسه پورې کنګل ساتلې او اسلامي امارت ته مشروعیت نه ورکوي. د تعامل پر ځای ورځ تر بلې بندیزونه لګوي. اسلامي امارت ته په کار ده چې د افغان ولس مشروع غوښتنو ته باید لیبک ووايي. کومې ستونزې چې اوس شتون لري هغه باید د یوه تفاهم له لارې حل شي.»
هڅه مو وکړه چې د امريکا بهرنيو چارو وزارت د وياندې وروستيو څرګندونو په اړه د اسلامي امارت نظر هم واخلو، خو د پرلپسې اړيکو سره سره مو بیا هم نظر ترلاسه نه کړ.
دا په داسې حال کې ده چې له دې وړاندې د اسلامي امارت ویاند ذبیح الله مجاهد د امریکایي بندیانو خوشې کېدل او د کورنیو چارو وزارت پر سرپرست د جایزې لغوه کول په بهرني سياست کې د اسلامي امارت پرمختګ ګڼلی وو.
