د امریکا د بهرنیو چارو وزارت په افغانستان کې د یوې بندي امریکايۍ مېرمنې د خوشې کولو هرکلی کړی.
د امریکا د بهرنیو چارو وزارت ویاندې ټمي بروس ویلي، له افغانستانه د فایي ډي هال په نوم د امریکايي تبعه له بنده خوشې کول د ټرمپ ادارې د ژمنې اثبات دی چې په نورو هېوادونو کې د ټولو امریکایي اتباعو د آزادولو لپاره یې لري.
بروس په یوه خبری کنفرانس کې ټینګار وکړ چې امریکا به تر هغو آرام ونه کړي چې خپل ټول زنداني اتباع یې بېرته امریکا ته نه وي ستانه کړي.
هغې زیاته کړې:« امریکا په افغانستان کې له زندانه د فايي هال د خوشې کېدو هرکلی کوي. د مارکو روبیو په خبره، د ولسمشر ټرمپ ژمنه واضحه ده او هغه دا چې موږ به تر هغو آرام ونه کړو ترڅو مو په افغانستان کې ټول بندي امریکايان خوشې کړې نه وي او دغه راز په ټوله نړۍ کې برمته امریکایان بېرته کور ته راستانه نه کړو. د امریکا او خپلو وګړو امنیت او خوندیتوب زموږ لپاره لومړیتوب دی.»
دوې اوونۍ وړاندې جوج ګلېزمن او په دې اوونۍ کې فایي ډي هال هغه دوه امریکايي وګړي دي چې د اسلامي امارت له لوري د قطر په منځګړیتوب له زندانه خوشې کېږي.
د بهرنیو چارو وزارت د جوج ګلېزمن د خوشې کولو په غبرګون کې ویلي وو چې نوموړی یې د منځګړي هېواد او واشنګټن سره تر څو ځلې مذاکراتو وروسته له بنده خوشې کړی.
د اسلامي امارت له زندانه د ۲۰۲۵ کال د مارچ په ۲۹مه خوشې شوې امریکايۍ مېرمن فايي ډي هال په یو لنډ ویډیويي پیغام کې د امریکا له ولسمشر ډونالډ ټرمپ مننه کړې چې ادارې یې د دې د خوشې کولو لپاره بریالۍ هڅې وکړه.
د سیاسي چارو کارپوهان په افغانستان کې د بهرنیو زنداني اتباعو د خوشې کېدو په برخه کې د سرپرست حکومت تګلاره هېوادونو سره د سیاسي تعامل او باور جوړونې په برخه اغېزمنه بولي.
د سیاسي چارو شنونکی اختر محمد راسخ وايي: « د طالبانو له زندانونو د امریکايي وګړو خوشې کېدل، د ښو او ډېپلوماټیکو اړیکو او دغه راز د نړیوالو اصولو او حقوقي قوانینو سره سم، د اعتماد جوړونې، راکړې ورکړې او رسمیت پېژندلو لپاره د لار هوارولو مانا لري.»
د سیاسي چارو شنونکی توریالی ځاځی وايي: « اوس داسې یو احساس موجود دی چې د اسلامي امارت په اړه د نړیوالو نظر هم مثبت دی، ځکه چې دوی په افغانستان کې سوله او امنیت ټینګ کړی. هغه مسایل چې د اسلامي امارت یا هم افغانستان لپاره خنډ ګرځي او دومره ارزښت هم نه لري لکه همدا د بندیانو خوشې کول، دا خپله یوه مثبته کړنه ده چې طالبانو ترسره کړې او د امریکا له خوا یې هم هرکلی شوی.»
سرپرست حکومت د امریکا د بهرنیو چارو وزارت د دې څرګندونو په اړه څه نه دي ویلي چې ګوندې د افغانستان په زندانونو کې دې نور امریکايي وګړي هم بندیان وي.
