واک ته د اسلامي امارت له بیا ځلې رسېدو سره سم د هېواد په مرکز او ولايتونو کې زندانونه مات او په لسګونه زره بندیان له زندانونو ووتل.
خو تازه د زندانونو چارو د سمون ادارې پوځي مرستیال حبیب الله بدر له شمشاد سره په مرکه کې وايي، په تېرو شاوخوا درنيمو کلونو کې امنیتي ځواکونو هغه مجرمین چې د هېواد امنيت ته ګواښ پېښولی شي بېرته نیولي دي.
بدر زیاتوي، اوس مهال اسلامي امارت په بندخونو کې شاوخوا ۱۳۰ بهرني وګړي بندیان دي.
د بدر په خبره، نېول شوي بهرني اتباع پر بېلابېلو جرمونو تورن دي چې ډېری برخه يې د ګاونډيو هېوادونو اوسېدونکي دي.
هغه زیاتوي:« له موږ سره د ټولو ولایتونو په بندخونو کې بهرني اتباع شته دي، ۱۰۰ تر ۱۳۰ کسان دي. جنايي قضیو کې او جعل کاریو کې بندیان دي. دا کسان د ګاونډیو هېوادونو دي.»
د بندخونو د چارو د سمون ادارې پوځي مرستیال وايي، ۱۲زره تنه چې یو زر او ۴۰۰ یې ښځې او ۳۰۰ تنه د اسلامي امارت غړي دي د بېلا بېلو جرمونو له امله د هېواد په بندخونو کې بندیان دي.
بدر دغه راز د اسلامي امارت په بندخونو کې هر ډول ربړونې او شکنجې راپورونه ردوي او زیاتوي، که څوک دا عمل ترسره کړي عدلیې او قضایي ارګانونو ته به يې وروپېژني.
د بدر په خبره، د بشر حقونو نړيوال سازمانونه هم کولی شي چې د شته اندېښنو د رفع کولو لپاره د افغانستان له بندخونو لیدنه وکړي.
هغه په دې اړه وايي:« په ټولو ولایتونو کې وهل، ټکول، تعزیر ورکول او ذهني فشار ورکول په مطلق ډول بندي دي. یو بهرنۍ مغرضې کړې دي، هغه کړۍ چې د افغانستان کړېدلی او ځورېدلی ولس تعزیز کوي او ذهني فشار پرې راولي چې ګواکې په زندانونو کې وهل، ټکول او ځورول دي، خو څوک به یې ثابت نه کړي. په کراتو یوناما هم دغه راپورونه خپاره کړې چې په بندخونو کې ښه ترتیب روان دی. سره صلیب هم دا پورته کړي او ټولو رسنیو دا خپاره کړي. موږ د ټولو پرمخ دروازې خلاصې کړي.»
د زنداندانو چارو د سمون ادارې پوځي مرستیال د شخصي زندانونو په اړه هر ډول ادعاوې ردوي او ډاډ ښې چې هېڅ چاته به اجازه ورنه کړي چې شخصي زندانونه جوړ او خلک محاکمه کړي.
