د زندانونو چارو د تنظيم ادارې نظامي مرستیال حبیب الله بدر وايي، د اصلاح په مرکزونو کې د زندانونو بدلولو لپاره په دغو ځایونو کې اکاډميک مرکزونه جوړوي.
بدر دغه څرګندونې د ماشومانو اصلاح په مرکزونو کې د ملګرو ملتونو په همکارۍ له حرفوي زده کړو د یو شمېر ماشومانو په فراغت غونډه کې وکړې او زیاته یې کړه، په يادو مرکزونو کې به زندانيانو ته د ثانوي، لېسانس او ماسټرۍ تر کچې زده کړې ورکړل شي.
بدر زیاتوي:« دغو ماشومانو ته مسلکي او حرفوي زده کړې ورکول کېږي ترڅو له دې ځایه تر وتلو وروسته، کار وکړي او کورنۍ ته نفقه پیدا کړي.»
په ورته مهال، په کابل کې د ماشومانو د اصلاح مرکز مسوولین وایي، په دې مرکز کې د موجودو ماشومانو د اصلاح په موخه يې د سیرت النبي سیالۍ ترسره کړې او۳۶ ماشومانو په کې لوړې نمرې تر لاسه کړې دي.
د دوی په خبره، د دغو ماشومانو د اصلاح په موخه يي ټولو ته دینې، عصري او حرفوي زده کړي پيل کړې دي.
کابل کې د ماشومانو د اصلاح مرکز رییس شرافت الله حقاني وايي: « له نېکه مرغه د کابل ولایت د اصلاح او روزنې په مرکز کې د امنیتي او اداري چارو ترڅنګ، اسلامي امارت د نړیوالو موسسو په همکارۍ د حرفوي زده کړو ترسره کولو چارې هم سمبال شوې دي.»
بله خوا، په یاد مرکز کې ساتل کېدونکي ماشومان وايي، په تېرو اتو میاشتو کې يې د دیني او عصري زده کړو تر څنګ په بېلابېلو برخو کې حرفوي زده کړې هم ترلاسه کړې او د اصلاح له مرکز څخه تر وتلو وروسته به په خپل مسلک کې کار وکړي.
د اصلاح مرکز کې تر روزنې لاندې یو تن ماشوم وايي: « دغو کورسونو موږ ته ډېره ګټه وکړه، زه له موسسې مننه کوم چې دغه زمینه یې برابره کړه. دلته چارواکي له موږ سره ښه چلن کوي، دا ځای داسې نه دی لکه زندان بلکې د لیلیې په شان دی. دلته زموږ هر ډول ستونزو ته رسېدنه کېږي.»
په دغه مرکز کې ټولټال ۳۵۷ ماشومان ساتل کيږي چې د چارواکو په خبره، د بېلابېلو جرمونو ترسره کولو له امله یاد مرکز ته ور وړل شوي دي.
