د امريکا ولسمشر جو بايډن وايي، کورونا وبا نور د امریکايي وګړو پر ژوند کنټرول نه لري، خو په خبره یې لا هم ختمه شوې نه ده.
بایډن له امریکايي وګړو غوښتنه وکړه، چې د هېواد پالنې حس ښودلو په خاطر دې د کورونا وبا ضد واکسین وکړي.
بایډن پرون د امریکا د خپلواکۍ ورځې په مناسبت شااوخوا ۱۰۰۰ روغتیايي کارکوونکي او نور کسان چې د وبا پر وړاندې د مبارزې په لومړۍ کرښه کې وو، په سپینه ماڼۍ کې مېلمانه کړي وو.
ولسمشر زیاته کړه، دوی اوس مهال تر بل هر وخت له کورونا وبا څخه د خپلواکۍ اخېستلو ته نږدې شوي دي.
د مالوماتو له مخې، په دې هېواد کې ۶۷ سلنه بالغو وګړو، د کورونا وبا ضد واکسین لږ لږه یوه دوز لګولی دی.
دا په داسې حال کې ده، چې ولسمشر بایډن د روان کال ۲۰۲۱ زېږدیز تر جولای میاشتې پورې د ۷۰ سلنه امریکايي وګړو د واکسین کېدلو هدف ټاکلی و.
