د امریکا ولسمشر په سپینه ماڼۍ کې د يوې پوښتنې په ځواب کې له افغانستانه د خپلو ځواکونو د اېستلو له خپلې کړې پرېکړې یو ځل بیا ننګه وکړه.
بایډن وايي، کلونه وړاندې يې ويلي ول چې القاعده به په افغانستان کې نه يوازې دا چې ځای نه لري، بلکې پر وړاندې به يې په مبارزه کې طالبان هم ورسره همکاري کوي.
هغه زیاته کړې:« در یاد کړئ، چې ما هغه وخت څه وویل؟ ما وویل چې القاعده به هلته نه وي، ما وویل چې موږ به له طالبانو مرسته واخلو. اوس څه پېښېږي؟ رسنۍ مو وڅارئ، ما سم ویلي ول.»
په ورته مهال د افغانستان بهرنیو چارو وزارت د بایډن دا څرګندونې د حقیقت درک بللی او ویلي یې دي، هېچاته به اجازه ورنه کړي چې د افغانستان خاوره د نورو پر ضد وکاروي.
د بهرنیو چارو وزارت ویاند عبدالقهار بلخي وايي:« موږ په افغانستان کې د و سلهوالو ډلو د نهشتون په اړه د امریکا د ولسمشر جوبایډن څرګندونې واقعیت درک ګڼو او وايو چې دا د ملګرو ملتونو د بنديزو د څار ډلې هغه راپور تکذیبوي، چې ګواکې په افغانستان کې له ۲۰ ډېرې جنګي ډلې شتون او فعاليت لري.»
د امریکا ځېنو پخوانيو چارواکو د جو بایډن دې څرګندونو ته ويلي، ښایي د نوموړي دا خبرې د امریکا د ملي اطلاعاتو شورا د هغو ارزونو پر اساس وي، چې څو ورځې وړاندې خپرې شوې وې.
د افغان سولې لپاره د امریکا پخوانی ځانګړی استازی وايي:« د افغانستان په اړه د لسمشر جوبایډن نننۍ څرګندونې ښایي د ملي استخباراتو شورا وروستۍ ارزونې پورې اړه ولري چې څو ورځې وړاندې د ډي.اېن.آی له خوا افشا شوې وې چې ځینې برخې یې له سره تنظیم شوي.»
شنونکي بیا دغه څرګندونې له واقعیت لرې بولي او بهرنیان د افغانستان په تړاو په بېلابېلو دریځونو او دوه مخيتوب تورنوي.
د بایډن دغه څرګندونې داسې مهال دي، چې له دې وړاندې مخکېنيو او برحاله امریکایي چارواکو ویلي ول چې القاعده ډله په افغانستان کې د منسجم کېدو په حال کې ده او په خبره يې دا احتمال شته چې تر ۲۰۲۴ زېږدیز کال پورې له افغانستانه بهر د عملياتو د ترسره کولو جوګه شي.
