بامیانو کې لسګونه کورنیو ته کورونه جوړېږي

د کډوالو په چارو کې د ملګرو ملتونو ستره کمېشنري په بامیانو ولایت کې ۱۴۴ سمڅ‌مېشتو کورنیو ته سرپناه جوړوي.

د بامیانو سیمه ییز مسوولین وايي، د کډوالو په چارو کې د ملګرو ملتونو د سترې کمېشنرۍ مرستیال او ورسره مل پلاوي د بامیانو د سیمه ییزې ادارې له مشرتابه سره د کتنې پر مهال د یاد ولایت ۱۴۴ کورنیو لپاره د یوه هستوګنیز ښارګوټي د بنسټ ډبره کېښوده.

د بامیانو د والي ویاند عبدالصبور سیغاني ویلي،یاد ښارګوټی په ۱۲ هکتاره ځمکه کې د کډوالو په چارو کې د ملګرو ملتونو  په مالي ملاتړ جوړېږي، چې پر هر کور  ۴ زره امریکایي ډالره لګښت راځي.

د بامیانو والي عبدالله سرحدي له یاد سازمان د مننې ترڅنګ ویلي،د اسلامي امارت مشرتابه داخلي او بهر څخه راستنېدونکو کډوالو لپاره د هستوګنې او د ژوندانه وسیلو د برابرولو په برخه کې ګټور پلانونه لري.

په همدې حال کې د کډوالو په چارو کې د ملګرو ملتونو د عالي کمېشنرۍ مرستیالې ګیلیان تریګس ویلي، چې په دغه ولایت کې به ۱۴۴ کورنیو جوړ کړي،چې په هر کور به ۴ زره امریکایي ډالره لګښت راشي.