د خوړو نړیوال سازمان استازې په خبره ۲۲ اعشاریه ۸ میلیونه افغانان له شدیدې لوږې سره مخامخ دي او ۸ اعشاریه ۷ میلیونه نور بیا له لوږې سره یوازې یو قدم واټن لري.
هغه وايي:« په ۲۰۲۱ کال کې موږ پلان درلود،چې ۱۵ میلیونه افغانانو سره مرسته وکړو،چې دغې هدف ته رسېدلي او په پاتې څو ورځو کې به نورې مرستې هم وکړو،دا شمېرې به نورې هم لوړې شي،خو د ۲۰۲۲ کال لپاره مو هدف ۲۳ میلیونه خلکو سره مرستې رسول اېښی دی،چې هره میاشت ۲۲۰ میلیونه ډالرو ته اړتیا لرو.»
د افغان ماشومانو ژوند هم له ګواښ سره مخامخ بلل کېږي،چې د خوړو نړیوال سازمان یې اندېښمن کړی دی.
ایلن وايي:« په ۲۰۲۱ کال کې زموږ د مالوماتو له مخې ۳ اعشاریه ۲ میلیونه افغان ماشومان پر خوارځواکۍ اخته بلل شوي،چې له منځه یې یو میلیون د مرګ له ګواښ سره مخامخ دي او ښايي شمېرې تر دې هم لوړې وي،ځکه دا یوازې هغوی چې روغتونونو ته ورغلي.»
د خوړو نړیوال سازمان د مرستو رسولو لپاره د اړمنو کسانو پېژندنې لپاره خپل استازي ګومارلي او له ځنو موسسو د همکارۍ تمه لري.
