Skip to content
د افغانستان لپاره د ازبکستان ولسمشر ځانګړي استازي عصمت الله ایرګه شوف د جمعې پر ورځ د «۱۴۰۰ کال د مرغومې پر ۳ مه» په بلخ کې د دغه هېواد له لوري د مرستو سپارلو پروګرام کې د خبرو پر مهال وویل، په اوسنيو شرايطو کې بايد نړيواله ټولنه له افغانانو سره خپلو مرستو ته دوام ورکړي.
شوف غوښتنه وکړه،چې افغانانو سره د بشري مرستو تر څنګ بايد د افغانستان کنګل شوې پانګه ازاده شي.
هغه زیاته کړه:« موږ نړيواله ټولنې ته بلنه کړې،چې په دغو پېچلو شرايطو کې بايد ټول له افغانستان سره مرسته وکړو. موږ همدا راز غوښتنه کړې،چې د نړۍ ستر هېوادونه دې د افغانستان کنګل شوې پيسې ازادې کړي، تر څو افغانان ورڅخه ګټه واخېستلی شي.»
افغانستان سره د نړيوالې ټولنې د بشري مرستو په دوام، د ازبکستان هېواد لخوا مرسته شوي خوراکي او سون توکي پرون مزارشريف ښار ته ورسېدل.
اخوا د افغانستان بهرنيو چارو وزارت سياسي مرستيال شېر محمد عباس ستانکزي د ازبکستان له همکارۍ د مننې تر څنګ له ياد هېواد غوښتنه وکړه،چې افغانانو ته دې د ويزو برخه کې اسانتياوې رامنځته شي.
ستانکزي زیاته کړه:« که د کابل، هرات او مزار شریف په ګډون نورو ولايتونو کې ستاسې ديپلوماتيک دفترونه افغانانو لپاره د ويزو برخه کې اسانتياوې رامنځته کړئ. نو اسلامي امارت به مو منندوی وي.»
په دغه پروګرام کې افغان او ازبکستاني لوري همدا راز د دوه اړخيزو همکاريو پر دوام هم ټينګار وکړ او همدا راز غوښتنه وشوه،چې ازبکستان دې د پخوا په څېر افغان ځوانانو ته تحصيلي بورسونه ورکړي.
ستانکزی وايي:« هغه تحصيلي بورسونه،چې د پخوانيو حکومتونو پر مهال افغان ځوانانو ته ورکول کېدل اوس زموږ غوښتنه له دوست هېواد ازبکستان همدا ده،چې د پخوا پر څېر افغان ځوانانو ته تحصيلي بورسونه ورکړي.»
د بلخ والي قدرت الله ابوحمزه وايي:« له افغانانو سره د همکارۍ په سلسله کې دا دويم ځل دی،چې زموږ ګاونډی او دوست هېواد ازبکستان له افغانانو سره بشري مرسته کوي، موږ مننه ترې کو.»
د ازبکستان د بشري مرستو ټوليزه اندازه ۳۷۸۰ ټنه خوراکي توکي، البسه او سون توکي دي،چې په ۶۳ کانټينرونو کې د حيرتان بندر له لارې مزارشريف ښار ته تر لېږدول کېدو وروسته پرون بلخ کې افغان چارواکو ته وسپارل شول.
