یو شمېر ایراني دولتي رسنیو راپور ورکړی چې د دې هېواد د کرمان والي ښوونیزو بنسټونو ته امر کړی چې د هغو افغان کورنیو ماشومان په ښوونځيو کې شامل نه کړي چې قانوني اسناد نه لري او یا هم په غیر قانوني توګه دغه هېواد ته ورغلي.
محمد مهدي فداکار د کرمان ولایت د ښوونیزو بنسټونو مدیرانو ته خبرداری ورکړی چې له دې امر د سرغړونې په صورت کې به له قانوني چلن سره مخامخ شي.
هغه زیاته کړې: « د بهرنیو زده کوونکو د شمولیت پروسه په جدي توګه څارل کېږي. نورباید په ښوونځیو کې حتی د یوه بې اسناده او ناقانونه افغان شاملېدو شاهدان ونه اوسو. هېڅوک حق نه لري بې اسناده زده کوونکي په ښوونځیو کې شامل کړي او که د کوم ښوونیز بنسټ مسوولینو دغه کار وکړ، له قانوني چلن سره به مخ شي.»
سرپرست حکومت د ایران په کرمان ښار کې له ښوونځیو د یو شمېر افغان کډوالو د منع کېدو پرېکړې په تړاو تراوسه غبرګون نه دی ښودلی، خو له دې وړاندې یې په کراتو له ایران او نورو ګاونډيو هېوادونو غوښتي چې د افغان کډوالو سره د زور زیاتي چلن پای ته ورسوي او د نړیوالو اصولو له مخې یې د کډوالۍ له حقونو بې برخې نه کړي.
په ورته مهال، له ایرانه را شړل شوي افغانان وايي، په دې هېواد کې د پولیسو له لوري له اسناد لرونکو او بې اسنادو افغانانو سره یو ډول ناوړه چلن کېږي.
د دوی په خبره، په ایران کې افغان کډوال له سختو شکنجو او زندانونو سره مخ دي، خو د مخنیوي لپاره یې د پام وړ ګامونه نه دي پورته شوي.
له ایرانه را ایستل شوی افغان کډوال اسامه سادات وايي: « وهل، ټکول، زندانونو ته اچول او را شړل هغه څه دي چې ما په ایران کې تجربه کړل. ما سره د افغانستان پاسپورټ او د ایران ویزه وه، خو د دې هېواد پولیسو ته هېڅ ارزښت نه لري. دوی له قانوني او غیر قانوني افغانانو سره یو ډول چلن کوي.»
له دې سره، یو شمېر کارپوهان پر ایران نیوکه کوي چې له لسیزو راهیسې یې له افغان کډوالو سره د نړیوالو قوانینو خلاف ناوړه چلن کړی او د بشري حقونو په برخه کې یې ټول اسلامي او نړیوال قوانین نقض کړي دي. دوی له سرپرست حکومته غواړي چې د افغانانو لپاره دې په کور دننه د تعلیم او کار فرصتونه برابر کړي.
د سیاسي چارو شنوونکی عزیز معارج په دې اړه وايي: « دا ښکاره خبره ده چې ایران د افغان کډوالو په اړه د کډوالۍ نړیوال کنوانسیونونه نه عملي کوي او نه هم د بشري حقونو نړیوالې اعلامیې او دغه راز د افغانستان او ایران ترمنځ شویو تړونونو ته ژمن دی. د اسلامي امارت سرپرست حکومت ته په کار ده چې په دې اړه جدي ګامونه پورته کړي.»
په وروستیو څو میاشتو کې ایران زرګونه افغان کډوال پهر زوره له دغه هېواده ایستلي او نوي منتخب حکومت یې پریکړه کړې چې تر راتلونکو شپږ میاشتو به له خپل هېواده شاوخوا دوه میلیونه افغانان افغانستان ته ستانه کړي.
