د رياست الوزرا اقتصادي مرستيال ملا عبدالغني برادر اخوند پر مشرۍ ایران ته تللي پلاوي د دغه هېواد د کورنيو چارو، کرنې او د انرژۍ له وزيرانو سره کتلي دي.
د رياست الوزرا له دفتره په خپره شوې خبرپاڼه کې ويل شوي، چې په د دغه لېدنه کې دواړو لورو د اوبو مدیریت، د برښنا تولید په برخه کې د ایران پر تخنیکي همکارۍ سربېره پر پانګونې، د وچکالۍ پر وړاندې د ګډې همکارۍ په رامنځته کولو خبرې اترې کړي.
د رياست الوزرا اقتصادي مرستيال ملاعبدالغني برادر ویلي:« وروستیو وچکالیو د سیمې او په ځانګړي ډول د افغانستان د اوبو پر سرچینو بد اغېز کړی، چې له امله یې د ځمکې سر او تر ځمکې لاندې اوبو کچه د پام وړ کمه شوې ده. څه موده وړاندې د ایران تخنیکي هیئت د هلمند له سیند څخه لیدنه وکړه، دوی دا ومنله چې د هلمند سیند اوبه له خپلې کچې څو برابره کمې شوي دي او د اسلامي امارت دریځ په دې برخه کې پر ځای دی.»
همدارنګه د ریاستالوزراء اقتصادي مرستیال له ایراني لوري غوښتي، چې له افغانستان سره دې په کور دننه د بادي، اوبیزي او لمریزې برښنا د تولید په برخه کې پر همکارۍ سربېره په ياده برخه کې پانګونه وکړي.
برادر زیاته کړې:« افغانستان چې تازه له جګړو را وتلی د اوبیزې، بادي، لمریزې، ډبرو سکرو برښنا د تولید په برخه کې پرېمانه سرچینې لري، چې په استفادې سره به یې په کوردننه د برښنا کمښت ستونزه حل او صنعت به ورسره د پام وړ وده وکړي. موږ له تاسې غواړو چې د برښنا د توليد په برخه کې له موږ سره همکاري وکړئ.»
د ایران د انرژۍ وزیر علي اکبر محرابیان ويلي، هېواد يې چمتو دی چې له افغانستان سره د وچکالۍ مخنيوي پر وړاندې د ګډې مبارز ترڅنګ د اوبو مدیريت په بر خه کې اړین اقدامات وکړي.
محرابیان زیاته کړې:« موږ د ایران او افغانستان له لوري د وچکالۍ پر وړاندې د ګډې مبارزې، په افغانستان کې د برښنا تولید په برخه کې د ایران پر تخنیکي همکارۍ سربېره پر پانګونې او د اوبو سم مدیریت او استفادې په برخه کې همکارۍ ته ژمن يو.»
د دې لېدنو پر دوام د رياست الوزرا اقتصادي مرستيال ملا عبدالغني برادر د ایران له کورنيو چارو وزیر سره کتلي او له نوموړي يې غوښتې، چې په دغه هېواد کې د بېلابېلو جرمونو په تور افغان بندیان خوشيې او سرپرست حکومت ته يې وسپاري.
د ایران کورنيو چارو وزیر وحيد احمدي ویلي:«د سرحدونو پیاوړتیا، د دواړو هېوادونو ترمنځ ګډ بازار، د نشهيي توکو پر وړاندې مبارزه، د سرحدي پوستو پیاوړتیا، د سوداګرۍ او ټرانزېټ پراختیا او په سرحدي سیمو کې د دواړو هېوادونو د وګړو د ژوند ښه والی د ایران لومړیتوب دی.»
بل لور ته د دې هېواد د کرنې وزیر علي نيکبخت سره هم افغان پلاوي لېدلي او په افغانستان کې يې د کرنې پر ميکانېزه کولو، د کوکنارو د بدیلو کښتونو په برخه کې پر مرستې، د اساسي کرنیزو محصولاتو او میوه لرونکو ونو د کښت د پراختیا په برخه کې پر پانګونې، د کرنې، اوبولګولو او مالدارۍ په برخه کې ظرفیت لوړونې، کرنیزو توکو ته د بازارموندنې په موخه د دواړو هېوادونو ترمنځ د نندارتونونو پر جوړولو بحث شوی دی.
