ایران د حقابې پرسر افغان لوري ته یوه میاشت وخت ورکړی

د اوبو پر سر د افغانستان او ایران ترمنځ راولاړه شوې وروستۍ ناندرۍ د ایراني لوري ترغوښتنو وراخوا اوس د جدي خبرداریو تر حده رسېدلي.

 د ایران د ولسمشر ابراهیم رئیسي تر ترخبرداري وروسته، په افغانستان کې د دې هېواد چارسمبالی او ځانګړی استازی حسن کاظمي قمي تازه افغان چارواکو ته د یوې میاشتې ضرب الاجل ټاکلی دی،چې په دې موده کې که چېرې افغان حکومت ایران ته د اوبو موضوع حل نه کړي؛ نو دوی  پوهېږي، چې څه وکړي.

قمي د خبرداري په بڼه دغه راز دا هم ویلي، که حاکم نظام په رېښتیني ډول غواړي افغانستان په راتلونکي کې ثبات، خپلواکي او ځمکنۍ بشپړتیا ولري، نو باید د ایران د اوبو حق ادا کړي. 

قمي  زیاته کړې:« که ثابته شي،چې په کجکي او کمال خان بندونو کې اوبه شته؛ خو دوی د ایران حقابه نه ورکوي، طالب چارواکي باید ځواب ویوونکي وي. افغانستان ته وخت پای ته په رسېدو دی. د ایران دولت پوهېږي، چې څه ډول عمل وکړي. طالب چارواکي باید پوه شي، که چېرې غواړي افغانستان کې ثبات، خپلواکي او ځمکنۍ بشپړتیا وي، نو له خپلو ګاونډیانو سره باید رغوونکی تعامل ولري.»

په ورته وخت کې د همدې مسلې په تړاو وړمه ورځ د ایران بهرنیو چارو وزیر امیر عبداللهیان د اسلامي امارت له چارواکو غوښتي، چې د حقابې مسله دې د اعلامیو تر خپرولو نه محدودوي، بلکې افغان حکومت باید د دوی متخصصانو ته په بندونو کې د اوبو د کچې عملي ازرونې اجازه ورکړي.

هغه زیاته کړې:« په وروستیو میاشتو کې مې څوڅو ځله  له امیرخان متقي غوښتي،ؤچې د هلمند د اوبو تړون ته ژمن پاتې شي او زموږ متخصصې ډلې ته دې د اوبو کچې د ارزونې اجازه ورکړي؛ خو لا یې دغه موضوع نه ده حل کړې. سیستان  او بلوچستان سیمې له سختې وچکالۍ سره مخ دي، دغه ستونزه د اعلامیې په خپرولو نه حل کیږي.»

د اسلامي امارت ویاند ذبیح الله مجاهد بیا د یاد ایراني چارواکي څرګندونو ته په غبرګون کې وایي، افغانان د ډار خلک نه دي چې له دا ډول ګواښونو ویریږي.

مجاهد د ایراني چارواکو دغه ډول بې مسوولیته څرګندونې یوازې  د دواړو هېوادونو اړیکو په زیان بولي.

کارپوهان بیا وايي، ایران له تېرو څو لسیزو راهیسې تر خپلې کچې هم په میلیاردونو متر مکعب زیاتې اوبه ترلاسه کړي، او د دې هېواد د چارواکو وروستیو تندو او د ډیپلوماتیکو نورمونو خلاص ژبه کارکونې ته په کتو، له ایراني لوري د هغو میلیاردونو مکعب اوبو د حساب پوښتنه باید وشي،چې په تېرو څو لسیزو کې د تړون د ذکر شوې کچې هم زیاتې اوبه یې ترلاسه کړي.

په تېرو څو ورځو کې دا دویم ځل  دی،چې ایراني لوړپوري چارواکي افغانستان ته داسې ستغه او غیر ډېپلوماټیکه ژبه کاروي.

تر دې څو ورځې وړاندې د ایران ولسمشر ابراهیم رئیسي هم د دې مسلې پر سر افغان چارواکو ته په خطاب کې تنده ژبه کارولې،چې د رئیسي څرګندونې اسلامي امارت غیرمناسبې او پارونکې بللې وې او پر ایراني لوري یې غږ کړی،چې دغه ډول څرګندونې چې د دواړو لوریو ترمنځ د سیاسي فضاء د لاخرابوالي لامل ګرځي، ډډه وکړي.