که څه هم د سرپرست حکومت مسوولینو په ځلونه په افغانستان کې د نشه توکو پر وړاندې د جدي مبارزې خبره کړې او ویلي يې دي چې افغانستان کې د دې پدیدې کرکیله په مراتبو راټیټه شوې، خو لا هم وخت ناوخت د نشه يي توکو د کرکیلې په اړه ځيني هېوادونه اندېښنې شریکوي.
د کورنيو چارو وزارت د نشه يي توکو پر وړاندې د مبارزې معینیت يو پلاوی په دې برخه کې د تجربو او همکاريو ترلاسه کولو په موخه ايران ته تللی او هلته یې د ياد هېواد د کورنيو چارو وزارت له چارواکو سره ليدلي.
د نشه يي توکو پر وړاندې د مبارزې معینیت پر خپله اېکس پاڼه ليکلي، ايراني چارواکو د يادو توکو پر وړاندې د سرپرست حکومت مبارزه ستایلې ده.
د کورنيو چارو وزارت د نشه يي توکو پر وړاندې مبارزې معینیت وايي: « د دې هېواد د کورنیو چارو وزارت مرستیال د نشه يي توکو پر وړاندې د مبارزې له هغه پلاوي سره کتلي چې د کورنیو چارو وزارت د نشه يي توکو پر وړاندې مبارزې معین پر مشرۍ له افغانستانه ورغلی او د نشه يي توکو پر وړاندې د اسلامي امارت د مبارزې ستاینه یې کړې. په افغانستان کې د نشه يي توکو پر قاچاق، پېر او پلور او کرکیلې بندیز به لا زیاتې ښې پایلې ولري.»
ومو غوښتل د دې ليدنې په اړه د لا ډېرو جزیياتو په اړه د نشه یي توکو پر وړاندې مبارزې معینیت د چارواکو نظر هم واخلو، خو له نظر ورکولو یې ډډه وکړه.
په ورته وخت کې د سیاسي چارو شنونکي که څه هم د نشه یي توکو پر وړاندې د مبارزې لپاره د افغانستان او ګاونډویو هېوادونو هڅې مهمې او ګټورې بولي، خو ټینګار کوي چې د نشه یي توکو د کرکیلې مخنیوي لپاره باید پر بدیلو لارو غور وشي.
د سیاسي چارو شنونکی معین ګل څمکنی وايي: « دا به د دواړو هېوادونو ترمنځ د باور جوړولو فضا هم رامنځته کړي. ښه دا ده چې دواړه یوځای کار وکړي، ترڅو د دواړو هېوادونو ترمنځ اعتبار رامنځته شي.»
د سیاسي چارو شنونکی خلیل احمد نادم وايي: « ښکاره خبره ده چې د ایران او افغانستان له خوا ګډه مبارزه به مثبته پایله ولري، خو باید د دې پدیدې بدیلې لارې پیدا شي، یانې دا چې د کوکنارو د کښت لپاره بدیل کښت پیدا شي.»
دا په داسې حال کې ده چې د سرپرست حکومت له واکمنېدو راهیسې پر نړیوالو دریځونو د تروریزم سربېره په افغانستان کې د نشه یي توکو کرکیلې په تړاو هم اندېښنې شریکې شوې دي. خو دغه اندېښنې د سرپرست حکومت له خوا رد او افغانستان يې باثبات هېواد بللی.
