په ټاکنو د څار بنسټ له حکومت او لویې څارنوالۍ وغوښتل چې د ټاکنو کمېسیون چارواکي د مدیریتي ضعف له امله تر پوښتنو لاندې ونیسي.
ایتوا چې په تېرو پارلماني ټاکنو يې څار کړی، رسنیو ته ویلي، ټاکنې له هر اړخیزو ستونزو سره مخ وې او پکار ده چې ولسمشر مسؤولین وپوښتي.
ایتوا وايي، ټاکنیزه پروسه له بې نظمۍ سره مخ وه او په ځينو برخو کې د قانون خلاف پرېکړې وشوې.
د پارلماني ټاکنو له ترسراوي څو ورځې تېرېږي چې په دغه پروسه په ټاکنو د څار بنسټونو نیوکې لا هم شته.
په ټاکنو د څار بنسټ ایتوا د تېرو ټاکنو په تړاو څېړنه کړې چې دا پروسه یې ناکامه بللې.
ایتوا وايي، ټاکنیزه پروسه کې ډېرې ستونزې وې او د ضعیف مدیریت له امله حکومت مسؤلین تر پوښتنو لاندې ونیسي.
د ایتوا د موندنو له مخې ۲۴۸۲ سلنه مرکزونه ته د چې د ټولو نږدې نیمايي برخه کېږي، له بې نظمۍ سره مخ وو، کارمندان پکې نه او یا هم مواد نه وو ورته رسېدلي.
ایتوا وايي په پروسه کې د بې نظمۍ او ناسم مدیریت له امله په شرایطو برابر کسان د رای ورکولو له حق بې برخې شول.
دغه بنسټ تور پرورې کړ چې کمېسیون د بایومتریک په پېرلو کې هم درغلي کړې او زیات بایومتریک دستګاوې له دویم هېواد راوړل شوي چې قرار داد کې نه وو.
دغه راز ایتوا وايي چې د ټاکنو په ورځ ډېره درغلي په هغه مرکزونو کې شوې چې بایومتریک هلته کار نه کاوو.
له دې سره کمېسیون بحث کړی او پنځه داسې رییسان یې په نښه کړي چې بې غوري یې کړې او لوی څارنوالۍ ته به یې ور وپيژني.
