له پاکستانه د افغان کډوالو د جبري اېستلو او ورسره د زور زیاتي پر دوام، اوس تازه د یاد هېواد د بلوچستان ایالت د اطلاعاتو وزیر جان محمد اڅکزي ویلي، له پاسپورټ او ویزې پرته، ټول افغان کډوالو له دې هېواده وباسي.
د پاکستان ډاڼ ورځپاڼې د راپور له مخې، جان اڅکزي په خبري کنفرانس کې ویلي، هېڅ افغان کډوال نه شي کولی په افغاني پېژندپاڼه او اړوند نورو اسنادو په پاکستان کې پاتې شي.
اڅکزي زیاته کړې:« له پاسپورټ او وېزې پرته به هېڅ یوه افغان ته پاکستان ته د راتګ اجازه ورنه کړل شي. د دې ترڅنګ ټول هغه افغان کډوال به له دې هېواده اېستلو ته اړ کړل شي، چې ورسره د خپل هېواد پېژندپاڼې او نور اړونده اسناد وي.»
بل پلو سرپرست حکومت په ناڅاپي ډول له پاکستانه د افغان کډوالو پر زوره اېستلو نیوکه کوي او د شړلو پر وخت د دې هېواد د پولیسو له لوري ورسره شوی زور زیاتی او بد چلن د ګاونډیتوب او د نړیوالو اصولو خلاف عمل بولي.
د اسلامي امارت ویاند ذبیح الله مجاهد د پاکستان وروستۍ ناامنۍ هلته افغان کډوالو پورې تړل د دې هېواد تېروتنه بولي او له پاکستاني لوري غواړي چې په یوې او بلې پلمې دې د افغان کډوالو ځورونه بنده کړي.
مجاهد زیاتوي:« د پاکستاني شناختي کارتونو د ورکړې په اړه یاد هېواد خپل اصول او قوانین لري چې دا په پام کې نیول کېږي؛ خو موږ غواړو په دې نامه له کډوالو سره څوک زور زیاتی ونه کړي، په نرمۍ دې ورسره چلن وشي، افغانان دې نه زنداني کوي، په ناحقه دې ترې پیسې نه اخلي او نورې بهانې دې ورته نه جوړوي.»
د دې ترڅنګ د چارو یو شمېر شنونکي هم د افغان کډوالو پر وړاندې د پاکستان حکومت پالیسي او تګلاره د نړیوالو موازینو خلاف بولي.
دوی وايي، په داسې حال کې چې ژمی په نږدې کېدو دی او په کوردننه هم راستنېدونکو کډوالو ته د ژوند د معیشت د برابرولو لپاره وخت او نور امکانات محدودیږي؛ نو دې ته په پام پاکستان د نړیوالو اصولو په رڼا کې د افغان کډوالو د اېستلو پر تګلارې له سره کتنه وکړي.
د سیاسي چارو شنونکی سلیم پیګیر وايي: « د پاکستان حکومت خورا زیات افغان کډوال راووېستل، دوی باید د وري(حمل) په میاشت کې دا کار کړی وای، د ژمي په دا سړه هوا کې چې زموږ خلک تر خېمو لاندې ژوند کوي؛ نو په دې کار سره پاکستان وښوده چې له افغانانو سره قوي دوښمني لري.»
دا په داسې حال کې ده چې پاکستان د روان ۲۰۲۳ کال د نومبر میاشتې له لومړۍ نېټې د افغا کډوالو جبري اېستلو لړۍ پیل کړې او په دې موده کې یې نږدې ۴۰۰ زره افغان کډوال د تورخم او سپین بولدک له لارو د ډیورند فرضي کرښې دې غاړه ته راستانه کړي دي.
