د سولې عالي شورا وايي اساسي قانون کې تغیر د حکومت صلاحیت دی نه د امریکا.
له افغان حکومت پرته بل هېڅ هېواد نه شي کولی طالبان له بندیزونو او تور لیست وباسي.
سولې شورا وایي، که طالبان ریښتیا سوله غواړي، د سولې ادرس افغان حکومت دی چې اجرایوي صلاحیت لري.
سولې شورا د طالبانو ځینو غوښتنو ته په اشارې وايي، اساسي قانون کې تغیر د افغان حکومت او خلکو صلاحیت دی، نه د امریکا.
سولې شورا له طالبانو غوښتنه وکړه چې د سولې په تړاو لویې مشورتي جرګې ته خپل استازي معرفي کړي.
کابل کې د سولې میندو د دویم پړاو دریمې ناستې ته د لس ولایتونو څخه مېرمنې راغوښتل شوي چې څنګه کولی شي د سولې پروسه کې ونډه واخلي.
سولې شورا وایي، د ښځو له ګډون او د اتلس کلنو لاسته راوړنو له ساتنې پرته سوله ناشونې ده.
سولې شورا مرستیال عبدالخبیر اچقون له طالبانو غواړي چې د بندیزونو لرې کولو او له تورلیست څخه د دوی د مشرانو ویستلو لپاره باید له افغان حکومت سره خبرې وکړي.
اچقون وایي، طالبانو ته د نورو هېوادونو لارښوونې، نه طالبانو او نه هم هماغه هېوادونو ته ګته رسوي.
ښځې عادلانه سوله هغه بولي چې ښځې هم په کې ګډون ولري او خبره یې واورېدل شي.
سولې شورا له طالبانو او په کور دننه له ښځو غواړي چې د سولې په اړه لویه مشورتي جرګه کې برخه واخلي او د خپلو نظریاتو ترڅنګ د خلکو غوښتنې او وړاندیزونه هم واوري.
