ملګري ملتونه او یو شمېر نړيوال سازمانونه له تېرو درېیو کلونو راهیسې، په افغانستان کې د ښځو او نجونو پر اوسني وضعیت اندېښنې څرګندوي او له سرپرست حکومت غواړي د ښځو پر کار، زده کړو او اساسي آزادیو لګولي محدودیتونه لرې کړي.
واک ته د سرپرست حکومت له رسېدو سره، په فغانستان کې د بشري ناورين ترڅنګ د لوږې او بېوزلۍ ګراف هم لوړ شوی او د ملګرو ملتوو د موندنو له مخې، تر ډېره هغه ښځې د ياد بحران قرباني دي چې د خپلو کورنيو مسووليت ورله غاړې دی.
تازه د اسلامي همکاریو سازمان او اندونیزیا په افغانستان کې د ښځو اقتصادي پياوړتيا په موخه د همکاريو هوکړه ليک لاسليک کړ.
د دې هوکړه ليک له مخې، به د اندونيزيا په مالي ملاتړ په کابل او ولایتونو کې د ښځو اقتصادي ودې او ملاتړ لپاره یو لړ پروژې پلي شي ترڅو ښځې له اقتصادي پلوه پر ځان بسيا شي.
د اسلامي همکاریو سازمان د بشري مرستو مسوول خلیل ابراهیم وايي: « په کابل کې د اسلامي همکاریو سازمان او د اندونیزیا د بشردوستانه ماموریت ترمنځ په خصوصي او دولتي سکټورونو کې د افغان ښځو پیاوړتیا لپاره د نویو پروژو پیلولو هوکړه لیک لاسلیک شو. د اسلامي همکاریو سازمان او د اندونیزیا سفارت د کابل او نورو ولایتونو په خصوصي او دولتي سکټورونو کې د ښځو اقتصادي فعالیتونو پیاوړتیا په موخه دغه هوکړه لیک امضا کړ چې موخه یې د ښځو اقتصاد ته وده ورکول دي.»
ابراهیم وايي، د دې پروژې په پلي کېدو سره به د افغان ښځو اقتصاد څه ناڅه وغوړېږي او ډاډ ورکوي چې ډېری دغه پروژې به په کلیو او بانډو کې پلي شي.
که څه هم دوی د يادو پروژو د پيل کره وخت نه په ډاګه کوي، خو ابراهیم ډاډ ورکوي چې د دې پروژې له پلي کېدو وروسته به د دغه شان نورو پروژو پلي کول هم په پام کې دي.
هغه په دې اړه وايي: « دا پروژې په کابل کې د اندونیزیا سفارت له خوا تمویلېږي او په کلیو او ښاري سیمو کې د معیشت د پروژو له لارې د افغان ښځو د پیاوړتیا ملاتړ کوي. هو! د دې پروژې ټولیز هدف د ښځو اقتصادي وضعیت پیاوړي کول او د دوی کورنیو او د ټولنې په دوامداره پرمختګ کې د هغوی د ونډې اخیستلو وړتیا ډېرونه ده.»
بله خوا، نړيوال بانک ويلي، د ۲۰۲۱ کال له اګسټ وروسته یې له افغانستان سره یو میلیارد او ۷۰۰ میلیونه ډالر مرسته کړې.
د نړیوال بانک په راپور کې ویل شوي، چې دا مهال د افغاني ټولنې ثبات او معیشت ملاتړ، روغتیايي بېړنی غبرګون، د خوړو بېړنی خوندیتوب، د مدني ټولنو او سازمانونو د ظرفیت لوړولو ملاتړ او د کوچنیو پورونو پیاوړتیا په افغانستان کې د نړيوال بانک له مهمو پروژو څخه دي.
