د سرپرست حکومت له واکمنېدو سره د نړيوالو له لوري د اقتصادي بندیزونو لګول، طبیعي پېښې، بېوزلي، بېروزګاري او د بشري مرستو کمېدل هغه څه دي چې هېواد کې یې اقتصادي ننګونې او ستونزې لا ډېرې کړې دي.
سید پاچا همدې سخت حالت اړ کړی چې د یوې مړۍ ډوډۍ پېداکولو په موخه له سهار تر ماښامه پر واټونو لاس ګاډی وچلوي، خو له دې سره هم خپله کورنۍ نه شي مړولی.
د کابل اوسېدونکی سید پاچا وايي: « پر حکومت غږ کوم چې موږ ته د کار زمینه برابره کړي، ځکه په دې ډول ژوند نه تېرېږي، ترکومه به یې تېروو؟»
يوازې سید پاچا نه دی بلکې د کابل ښار د نورو اوسېدونکو په څېره کې هم غربت له ورايه ښکاري. دوی وايي، ورځ تربلې بېکاري او له امله یې بېوزلي زياتېږي.
دوی سرپرست حکومت مکلف بولي چې د دوی د فقر او نېستۍ ختمولو لپاره لاره پيدا کړي.
د کابل ښار اوسېدونکی بهرام الدین وايي:« ژوند سخت تېرېږي، ګوزاره مو نه کېږي. د ۲۰ افغانیو چای او بوره اخلو او له ډوډۍ سره یې خورو. زه منډوي کې لاس ګاډۍ چلوم او د ورځې ۱۰۰ تر ۱۵۰ افغانیو کار کوم، په دې به مې څه چاره وشي.»
د خلکو د دې شکايتونو ترڅنګ، تازه د ملګرو ملتونو د بشري مرستو همغږي کوونکي دفتر(اوچا) موندلې چې اوس مهال ۱۴.۸ ميليونه افغانان د خوړو خونديتوب نه لري او له دې ډلې ۳.۱ ميليونه تنه بېړني لاسنيوي ته اړتيا لري.
اوچا د خوړو له ناامنۍ سره مخ افغانانو ته د رسېدو لپاره د نږدې دوه میليارد ډالرو بسپنې اړتيا مطرح کړې، خو وايي دا مهال د يادې بسپنې يوازې ۹.۹ ميليونه ډالره په واک کې لري.
اوچا زیاته کړې:« په افغانستان کې روژه داسې مهال را رسېدلې چې هلته میلیونونه کسان نه پوهېږي د خپل بل وخت خواړه له کوم ځایه ترلاسه کړي. اوس مهال ۱۴.۸ میلیونه کسان له خوراکي ناامنۍ سره مخ دي چې ۳.۱ میلیونه یې د بېړنۍ رسېدنې په څلورم پړاو کې دي.»
په داسې حال کې چې خلک په دايمي توګه د ځان د تمويل لپاره د کارغوښتنه کوي، خو سرپرست حکومت د لوږې بېړني وضعيت کابو کولو لپاره د نړيوالو بشري مرستې مهمې بولي.
اقتصاد وزارت د مرستو غوښتلو ترڅنګ د افغانستان کنګل شوې شتمنۍ د آزادولو غوښتنه هم کوي.
د اقتصاد وزارت مسلکي معین عبداللطیف نظري وايي: « افغانستان کې د یو شمېر اقتصادي ستونزو لامل د افغانستان د خلکو شتمنۍ ګنګل پاتې کېدنه او نا عادلانه اقتصادي بندیزونه دي. موږ د بندیزونو لرې کېدو او د افغانستان د خلکو شتمنۍ آزادېدو غوښتنه کوو. په ورته وخت کې اسلامي امارت کار زیږوونکې او اقتصادي پروژې تر کار لاندې لاندې لري، ترڅو د افغانستان د خلکو اقتصادي ستونزې هوارې شي.»
بېوزلي د هېواد له هغو اوږدمهالو ستونزو او ننګونو څخه شمېرل کېږي چې تېرې څو لسېزې جګړې او اقلیمي بدلون یې لاملونه ګڼل کېږي. ملګرو ملتونو له دې وړاندې ویلي و چې لا هم شاوخوا ۲۳ ميلیون افغانان بشري مرستو ته اړتیا لري او همداراز د کار نه شتوالی د خلکو اساسي ستونزه ده.
