د ملګرو ملتونو بشري مرستو همغږۍ اداره (اوچا) وايي، دامهال په افغانستان کې د لوږې کچه د ريکارډ ترکچې لوړه شوې.
د اوچا په خبره ، که د بودیجې د سخت کمښت ستونزه یې هواره نه شي، نو په افغانستان کې د ژوند ژغورنې مرستو اندازه به ډېره راکمه کړي.
اوچا زیاته کړې:« د روان کال له جنورۍ تر جولای میاشتې پورې په افغانستان کې بشري شریکانو ۲۲.۶ میلیونه وګړو ته د خوړو او کرنې په برخه کې مرستې رسولي دي.»
بل خوا د خوړو نړیوال پروګرام (ډبلیو.ایف.پي) وایي، دا مهال په ۵۱ هېوادونو کې ۴۰ میلیونه وګړي د بېړنۍ لوږې له بېلابېلو کچو سره مخ دي، چې ۱۵ میلیونه یې په افغانستان کې ژوند کوي.
د یاد پروګرام موندنې ښیي، چې د مرستو کمښت د خوړو نه خوندیتوب بېړنۍ کچې ته د ځواب ويلو پر وړاندې یو لوی ګواښ دی.
یاد پروګرام زیاتوي:« اوس مهال په افغانستان کې له ١٥ میلیونه زیات کسان د خوړو له خورا نا امنۍ سره مخ دي او د خوراکي توکو مرستو ته اړتیا لري. خو د بوديجې د خورا کموالي له امله، ډبلیو.ایف.پي کولای شي په میاشت کې یوازې درې میلیونه کسانو ته مرسته ورسوي.»
د اقتصادي چارو کارپوهان وایي، افغانستان د ژمي په درشل کې دی او زیات شمیر خلک په ځانګړې توګه ښځې او ماشومان د خوراکي توکو په ګډون، بشري مرستو ته ډېره اړتیا لري او له نړیوالو غواړي، چې له افغانانو سره خپلې لا زياتې کړي.
دا په داسې حال کې ده، چې د خوړو نړیوال پروګرام د شنبې په ورځ راپور ورکړی، چې په افغانستان او سوډان کې میلیونونه خلک، خوراکي توکو ته د نه لاسرسي له لوړې کچې سره مخ دي او افغانستان یو له هغو لسو هېوادونو دی، چې د خوراکي توکو له ناورين سره مخ دی، چې له ٦ میلیونه ډېر خلک له قحطۍ سره یو ګام واټن لري.
