په کابل کې د ملګرو ملتونو سياسي استازولۍ(یوناما) مشرې روزا اوتنبایووا د ملګرو ملتونو عمومي اسمبلۍ ناستې ته په دوحې کې د افغانستان په اړه د ياد سازمان په نوښت د ترسره شوې ناستې جزیيات وړاندې کړل.
د دوحې ناسته د جون پر ۳۰ مه او د جولای پر لومړۍ نېټه ترسره شوه چې په کې د ۲۹ هېوادونو او نړيوالو بنسټونو په شمول، د سرپرست حکومت پلاوي هم ګډون درلود.
د یوناما مشره روزا اوتنبایووا وايي، د دوحې په دوه ورځنۍ ناسته کې له سرپرست حکومت سره پر ډېر تعامل او له افغانانو پر ملاتړ ټینګار شوی.
د اوتنبایووا په خبره، د ډېر تعامل او له افغانانو د ملاتړ پر غوښتنې سربېره دا مهم فرصت و چې د افغانستان په اړه نړیوالې ټولنې ژمنې له سرپرست حکومت سره شريکې شوې.
هغه په دې اړه وايي:« د خصوصي سکټور ملاتړ او د نشه يي توکو پر وړاندې هڅې یوه سټراټیژیکه، اقتصادي او بشري اړتیا ده او دا یو ښه فرصت دی چې له سرپرست حکومت سره پر نړیوالو اړتیاوو بحث وشي، ترڅو په ټولنه او د هېواد په اقتصادي سکټور کې د ښځو او نجونو مهم رول او حضور ښکاره وي.»
سرپرست حکومت بیا د روزا اوتنبایووا له څرګندونو هرکلی کوي او ټینګار کوي چې سرپرست حکومت د سیمې او نړۍ له ټولو هېوادونو سره د مثبت تعامل غوښتونکی دی او له نړیوالې ټولنې غواړي چې بنديزونه ترې لرې او تعامل ورسره وکړي.
د اقتصاد وزارت مسلکي معين عبداللطیف نظري وايي: « له ملګرو ملتونو زموږ غوښتنه دا ده چې د نړیوالې ټولنې او اسلامي امارت ترمنځ د تعامل لپاره لا ډېرې اسانتیاوې برابرې کړي. دغه راز د خصوصي سکټور د پياوړي کولو او اقتصادي ودې لپاره د افغانستان له خلکو سره مرسته وکړي.»
د سیاسي چارو شنونکي که څه هم له سرپرست حکومت سره تعامل د افغانانو د ستونزو حل معقوله لار ګڼي، خو له سرپرست حکومت دا هم غواړي چې د نجونو تعليم او تحصيل ته د اجازې په ورکړې سره، ياد هدف ته رسېدل اسانه کړي.
د سیاسي چارو شنونکی توریالی ځاځی وايي: « نړۍ او زموږ ولس ته شته یوازینۍ ستونزه د نجونو پر وړاندې د ښوونځیو او پوهنتونونو دروازې تړل دي. زه باور لرم، که اسلامي امارت دا ګام پورته کړي، نور به د نړۍ له خوا زموږ هېواد او خلکو ته کومه ستونزه نه وي.»
ځینې نور بیا په دوحه کې د ملګرو ملتونو د کاري ډلې ناسته له نړیوالې ټولنې سره د سرپرست حکومت د مثبت تعامل پر لور ښه ګام بولي.
د سیاسي چارو شنونکی ادریس محمدي ځاځی وايي: « زما په نظر، د اسمبلۍ غړي په دې همنظره وو چې باید اسلامي امارت د نجونو پر وړاندې د زده کړو دروازې خلاصې کړي، ترڅو له نورو امتیازونو او تعاملاتو برخمن شي او ورسره اسلامي امارت رسمیت او تعامل ته لاره پيدا کړي.»
په دوحه کې د ترسره شوې ناستې جزییات د یوناما له خوا داسې مهال رسنيز کېږي چې د کورنیو چارو وزارت ویاند له دې وړاندې ویلي و چې د دوحې په دوه ورځنۍ ناسته کې د نشهیي توکو پر وړاندې د مبارزې، پر يادو توکو د روږدو کسانو درملنې او د بزګرانو ته د بدیل معیشت رامنځته کولو په برخه کې بحثونه شوي.
خو دا لا تراوسه پورې نه ده په ډاګه شوې چې له سرپرست حکومت سره په يادو برخو کې د نړیوالو له خوا څه ډول ژمنې شوې دي.
