کابل کې د ملګرو ملتونو د سیاسي استازولۍ(یوناما) مشرې روزا اوتنبایوا په ختیځ کې د وروستۍ مرګونې زلزلې له امله د زیانمنو شویو د وضعیت ارزونې، مرستو رسونې او د زلزله ځپلو ستونزو اورېدو په موخه کنړ ته سفر کړی.
مېرمن اوتنبایوا په سیمه کې د ملګرو ملتونو اړوند مرستندویه ادارو شتون ستایلی او د دې سازمان له لوري يې د لا زیاتو بشري مرستو ډاډ ورکړی.
نوموړې همدا راز د ژمي له رانږدې کېدو سره د زلزله ځپلو وضعیت د اندېښنې وړ بللی او د زیانمنو لپاره يې د سرپناه او لا زیاتو اړینو مرستو چمتو کولو په موخه له بسپنه ورکوونکو د ۱۴۰ میلیون ډالر بودیجې غوښتنه کړې.
د يوناما مشرې د زلزله ځپلو سیمو د لیدنې پرمهال ویلي: « ملګرو ملتونو اړمنو ته مرستې برابرې کړې دي، خو بیا هم په بسپنه ورکوونکو غږ کوو چې ۱۴۰ میلیون ډالره نوره بودیجه هم چمتو کړي. ژمی را رسېدونکی دی، ژمی ډېر را نیږدې دی. دا یوه غرنۍ سیمه ده، هوا به ډېره ژر سړه شي. له همدې امله په ټولو هغو هېوادونو چې تر اوسه یې دلته مرسته نه ده کړې، غږ کوو چې خپلې مرستې برابرې کړې. ډېرې مرستې شوې دي، خو لا هم اړتیاوې ډېرې زیاتې دي. په خپلو شریکانو، د ملګرو ملتونو پر غړو هېوادونو او خصوصي سکټور غږ کوم چې باید راشي او له خلکو سره مرسته وکړي.»
یو شمېر زلزله ځپلي هم د ژمي له را نږدې کېدو وېره لري او په خبره یې تر ټولو بېړنۍ اړتیا دوی ته د استوګنځایونو برابرول دي.
د نورګل ولسوالۍ اوسېدونکی محمدشاه وايي: « د اوسنۍ مرستې زموږ اړتیاووې پوره کوي، خو زموږ کوټې او هرڅه وران دي، یخني را روانه ده او زموږ سخت ضرورت دی. زموږ مېنې باید جوړې شي.»
د زلزلې له امله نورې زیانمنې شوې کورنۍ که څه هم د حکومت، پانګه والو، مرستندیه بنسټونو له لوري د شویو مرستو هرکلی کوي، خو د خپل ژوند اوسني وضعیت ته په پام یې کافي نه ګڼي.
د نورګل ولسوالۍ اوسېدونکی محمود وايي: « د افغانستان له ولس او نړیوالو ډېره مننه کوو چې له موږ سره یې غم شریک کړی او مرستې کوي.»
زلزله ځپلی خان محمد وايي: « زموږ کورونه به بشپړ ډول وران دي، ویالې او کروندې ورانې دي او هر ډول فضل او شتمني مو ډوب شوي دي. شکر دی ډېرې مرستې وشوې او اوسنۍ اړتیاوې مو پوره کړې.»
د روانې وږي میاشتې په۱۰مه نېټه ختیځ ولايتونه د رېښتر په کچه ۶ درجې زلزلې ولړزول چې مرکز یې د کونړ نورګل ولسوالي وه.
د معلوماتو پر بنسټ، په دې زلزله کې پر اوښتو مالي زیانونو سربېره، يوازې په کونړ کې د ښځو او ماشومانو په ګډون ۲۲۰۵ تنه شهيدان او شاوخوا ۳۵۰۰ تنه نور ټپیان شوي دي.
