د ملګرو ملتونو ویاند وايي، د دې سازمان سرمنشي انټونیو ګوټرېش د قرغېزستان په پلازمینه بشکېک کې د شانګهای همکاریو سازمان د شپږویشتمې سرمشریزې په څنډه کې د تاجیکستان له ولسمشر امام علي رحمان سره لیدلي.
د سټېفن دوجاریک په خبره، په دې لیدنه کې د دواړو خواوو ترمنځ پر همکارۍ او سیمهییزې پراختیا سربېره، د افغانستان د وضعیت په تړاو هم خبرې شوې.
نوموړي دا نه دي ویلي چې دواړو خواوو د افغانستان په تړاو پر کومو مشخصو مسایلو خبرې کړې.
دوجاریک زیاته کړې: « په دې لیدنه کې د ملګرو ملتونو سرمنشي او د تاجیکستان ولسمشر د دواړو خواوو ترمنځ پر همکارۍ او د افغانستان د وضعیت په شمول د سیمهییزې پراختیا په تړاو خبرې وکړې.»
تېره اوونۍ د تاجیکستان د ملي امنیت دولتي کمېټې خبر ورکړی و چې دوه افغان اتباع یې له افغانستان سره په ګډه پوله هغه مهال وژلي چې له نشهيي توکو سره یې په غیر قانوني ډول تاجیکستان ته د ننوتو هڅه کوله.
هغه مهال د اسلامي امارت ویاند ذبیح الله مجاهد دې پېښې ته په اشارې د دوو ګډ سرحده هېوادونو ترمنځ دا ډول نښتې عادي مسایل بللي و او ډاډ یې ورکړی و چې نه پرېږدي افغان خاوره د تاجیکستان یا بل هېواد پر وړاندې وکارول شي.
د سیاسي چارو شنونکی، خلیل احمد نادم وايي: « افغانستان له تاجیکستان سره اوږد سرحد لري او تاجیکستان کله کله پر دغه سرحد له نا امنیو شکایت کوي. که څه هم اوس وضعیت ښه شوی، خو دوی بیا هم اندېښنه لري.»
تر هغه وروسته د تېرې اګسټ په ۲۸مه د ګډ امنیتي تړون سازمان منشي، طلعت بیګ مصدوقوف اعلان کړی و چې روسیه به د روان ۲۰۲۶زېږدیز کال په را روان مني کې تاجیکستان ته له افغانستان سره پر ګډه پوله د امنیت د لاټینګښت لپاره پوځي وسلې او تجهیزات واستوي.
د چارو شنونکي وايي، د دواړو هېوادونو ترمنځ پر پوله د امنیت د لا ټینګښت لپاره د دوه اړخیزو ګډو هڅو ترسره کېدل مثبت ګام دی، خو باید د ښکېلو خواوو په همغږۍ ترسره شي.
د سیاسي چارو شنونکی، جنت فهیم چکري وايي: « د تاجیکستان د ولسمشر اندېښنه دا ده چې افغانستان کې امنیتي ستونزې شته او ورپسې د اقتصادي مسایلو خبرې دي. د تاجیکستان اندېښنې بېځایه دي، ځکه افغانستان بار بار ویلي چې له افغان خاورې به څوک ونه ګواښل شي.»
دا داسې مهال ده چې اسلامي امارت تر دې وړاندې له تاجیکستان سره پر ګډه پوله د امنیت په تړاو ډاډ ورکړی او په دې برخه کې یې اندېښنې بېځایه بللې دي.
