د پاکستان تر کنټرول لاندې قبايلي سيمو او خيبرپښتونخوا کې د ناامنیو له زياتېدو سره، د افغانستان پر سرپرست حکومت د ياد هېواد چارواکو نيوکې هم ډېرې شوي.
پاکستاني چارواکي ادعا کوي، چې د يادو ناامنيو تر شا د افغانستان سرپرست حکومت ولاړ دی، خو کابل د دوی دغه ادعاوې په مکرره توګه رد کړې او ان تر دې، چې کابل د اسلاماباد ورته ادعاوو بې ارزښته ښودلو لپاره پرې غبرګون نه ښيي.
تازه د خيبر پښتونخوا اعلی وزیر علي امین ګندا پور وایي، پاکستان په تېر کې خپله جغرافيه د افغانستان پر ضد کارولې او په خبره يې اوس دې د ښو په تمې کولو سره، په قبايلي سيمو کې د روانو ناامنيو په اړه افغانستان نه ګرموي.
هغه زیاتوي:« زموږ هېواد کې ترهګري ده او پاکستاني چارواکي ټول اوس په ترهګرۍ خبرې کوي. زه پوښتنه کوم، چې ايا تاسو مخکې د امريکا په وينا پوځي عمليات نه دي کړي؟ خپلي اډې مو د خپل ګاونډي هېواد پر ضد د استعمال لپاره، چې پښتانه هم دي او مسلمانان هم دي، نه وې ورکړې؟ نن، چې څه وشي نو تاسو وايئ او تور لګوئ، چې دا له افغانستانه پلان شوي وو. تاسو د هغوی پر بچيانو د ګولیو ورولو لپاره اډۍ ورکړې وې، نو تاسو څنګه هېله لرئ، چې هغوی به ستاسو لپاره ګلان راولېږي.»
د سیاسي چارو کارپوهان د نوموړي څرګندونې له حقیقت سره تړلې بولي او وایي، پاکستان له تېرو څو لېسزو راهیسې نه غواړي، چې په افغانستان کې پياوړی مرکزي اقتدار حاکم وي.
دوی زیاتوي، پاکستان تل هڅه کوي، چې په کابل کې د پياوړي حکومت د جوړېدو مخنيوی وکړي او تر خپل اثر لاندې يې وساتي.
د سیاسي چارو کارپوه حکمت الله حکمت وايي:« هغه څه ته چې دوی( پاکستان) ښه وايي، هغه هم د افغانستان خرابۍ لپاره کارېدلي دي، که په امریکا کې ترهګریز برېدونه کېږي، که په مسکو کې ترهګریز کېږي، که په افغانستان کې کېږي، د پاکستان حکومت د دې مسوولت پر غاړه لري. د پښتونو مشرانو ته شاباس ویل په کار دي، چې دوی ورته وايي، هغه ګاونډي ته چې تا له امریکایانو سره لاس یو کړ او په میلیونه انسانان دې له کورونو وشړل، کلي دې بمبار کړل، هېواد دې ۲۰ کاله اشغال کړ، ته د امریکا متحد پاتې شوې، له همدې ګاونډي ته څه انتظار درلودلی شې؟ »
ځيني نور بیا پاکستان تورنوي، چې پر نړيواله کچه د افغانستان د سرپرست حکومت پر ضد لابي کوي او له دې لارې نړيوالو ته ښيي، چې له افغانستانه د ترهګرۍ د خورېدو وېره شته.
د پاکستان ادعا دا ده، چې د تحريک طالبان پاکستان ډلې مشران په افغانستان کې دي او له هماغه ځايه د پاکستان تر کنټرول لاندې سيمو کې برېدونه پلانوي.
خو سرپرست حکومت برعکس وايي، د داعش په ډله کې يې پاکستاني وکړي نيولي او هلته له روزنې وروسته افغانستان ته د تخريبي اعمالو لپاره رالېږل شوي وو.
