د بهرنیو چارو وزارت سرپرست مولوي امیرخان متقي له پاکستانه د افغان کډوالو د جبري شړلو او د کډوالو اړوند ستونزو په تړاو په کابل کې د پاکستان له شارژدافیر عبیدالرحمن نظاماني سره ليدلي او په پاکستان کې يې له افغانانو سره ناوړه چلن په اړه خپله خواشيني څرګنده کړې.
متقي دغه راز د افغان کډوالو پر وړاندې په پاکستان کې د روان چلن او د ياد هېواد د پرېکړو بدلولو غوښتنه هم کړې.
د بهرنیو چارو وزارت مرستیال ویاند ضیا احمد تکل په دې اړه وايي: « په دې لیدنه کې د افغانستان او پاکستان ترمنځ په سیاسي او اقتصادي مسایلو هر اړخيزې خبرې وشوې. د بهرنیو چارو وزیر په خپلو خبرو کې د افغان مهاجرینو په جبري اخراج او د ځینو ارګانونو له لوري له مهاجرینو سره په نامناسب چلن خپله خواشیني څرګنده کړه او روان ناسم چلن یې پاروونکې او د دواړو هېوادونو د اړیکو پر زیان وباله او د دې وضعیت د تغییرغوښتنه یې وکړه.»
د پاکستان شارژدافېر په دې لیدنه کې ډاډ ورکړی چې د سرپرست حکومت اندېښنې به له خپل حکومت سره شريکې کړي.
تکل وايي: « د پاکستان د سفارت سرپرست وویل، د اسلامي امارت تشویش درک کوي او یاده موضوع به له اړوندو ارګانونو سره شریکه کړي. په پای کې د دواړو لوریو له خوا د متقابلو اغېزمنو اقداماتو په کولو او د لوړ پوړیو پلاوو پر تګ راتګ ټینګار وشو.»
د پاکستان حکومت د روانې اپرېل میاشتې له پيل راهیسې د افغان کډوالو د جبري ستنولو دویم پړاو پیل کړی او تر اوسه یې سلګونه زره افغان کډوال افغانستان ته را ایستلي دي.
راستانه شوي کډوال د پاکستاني پولیسو له ناوړه چلن شکایت کوي او وايي، د پاکستان امنیتي ځواکونه یې په کورونو چاپې وهي، نیسي یې او پرته له دې چې د کور وسایل راټول کړي، افغانستان ته شړل کېږي.
