Skip to content
د افغان نجونو،ښځو او بشر حقونو لپاره د امریکامتحده ایالتو ځانګړې استازې رینا امیري له اسلامي هیوادونو وغوښتل،چې د ښځو حقونو ملاتړ وکړي.
امیري له سعودي ورځپاڼې سره مرکه کې پر اسلامي هېوادونو غږ وکړ،چې پر اسلامي امارت فشار راوړي،ترڅو د افغان ښځو حقونه او نجونو ته د زدهکړو اجازه ورکړي.
امیري زیاته کړې:«زه یوه مسلمانه یم.زه خپلې تجربې او اسلامي تاریخ ته په کتو پوهیږم، چې اسلام لومړنی دین دی،چې ښځو ته یې حقونه ورکړي دي. زه له اسلامي هېوادونو تمه لرم،چې له طالبانو سره په دې تړاو بحث وکړي او د هغوی دریځ وننګوي.»
رینا امیري په دغه مرکه کې د افغان ښځو د روان وضعیت په اړه هم اندیښنه څرګنده کړه.
امیري ویلي، افغان ښځې خپل راتلونکي ته ناهیلې دي.
هغې زیاته کړې:«افغان ښځې داسې فکر کوي،چې هغوی په یوه زندان کې دي.هغوی خپلې هیلې بایللي او راتلونکې ته ناهیلې دي.هغوی فکر کوي،چې پخپل هېواد کې په خپلو ظرفیتونو اختیار نه لري.»
امیري د نړیوالو بندیزونو له امله د افغانانو بد وضعیت ته په اشارې سره ویلي، غوره به دا وي،چې اسلامي امارت د دوحې هوکړې ته درناوی وکړي او ژمنتیا ورته وښيي.
هغه زیاتوي:«موږ له طالبانو غواړو،چې د دوحې هوکړې ته ژمن پاتې شي. موږ په دې باور یو،چې کوم بندیزونه د امریکا له لوري پر افغانستان لګیدلي دي، دغو بندیزونو ټول ۴۰ میلیونه افغانان اغیزمن کړي دي.»
رینا امیري په دغه مرکه کې ډېر تمرکز او ټينګار پر دې کړی د ی،چې اسلام ښځو ته تر نورو ادیانو ډېر ارزښت او حقوق ورکړي او اسلامي امارت دې هم هغوی ته د دغو حقونو پر ورکړې قایل شي.
