امنیت شورا: پر ښځو د کار بنديز به بشري مرستې او د ملکرو ملتونو اړوند ادارو کار اغیزمن کړي

د ملګرو ملتونو امينت شورا د اسلامي امارت له لوري د ښځو پر زده کړو او په کورنیو او بهرنیو غیر دولتي موسسو کې د ښځو کاري بنديز پريکړه غندلې ده.

 یادې شورا په ناسته کې د اسلامي امارت ورستۍ پريکړه خواشينونکې او د نړيوالو ټولنې سره د شویو ژمنو خلاف بللې ده.

د یادې شورا غړیو هېوادونو ويلي،دا ډول پريکړې به له افغانستان سره بشري مرستې او د ملګرو ملتونو سازمان اړوند ادارو کاري فغاليت اغیزمن کړي.

امنیت شورا:« موږ د طالبانو له خوا د ښځو پر زده کړو او کار بندیز غندو او ډېر خواشیني یو. د ښځینه کارکوونکو پر کار بندیز به افغانستان کې د بشري مرستو او د ملګرو ملتونو ادارو کاري بهیر به ډېر اغیزمن کړي. دا پریکړې د طالبانو له هغو ژمنو سره په ټکر کې دي،چې نړیوالې ټولنې سره یې کړې وې.» 

په ورته مهال د ملګرو متلونو عمومي منشي انتونيو ګوتېرش د  اسلامي امارت ياده پريکړه نه توجيه کيدونکی نقض بللی او له اسلامي امارت يې غوښتې دي،چې د ښځو زده کړو او کار اړوند کړې  پريکړه دې لغوه اعلان کړي.

هغه زیاته کړې:«د طالبانو له خوا د ښځو پر زده  کړو او کاري بهیر بندیز د بشري حقونو یو نه توجیه کېدونکی نقض دی،چې باید ژر تر ژره بېرته له منځه ولاړ شي. د ښځو او نجونو غږ غلی کول او له ټولنې د هغوی اېستل به عامو افغانانو باندې منفې اغیزې پریږدي.» 

په افعانستان کې د ملګروملتونو سازمان اړوند لسګونه ادارې فعالې او د بشري مرستو او خدماتو رسولو په برخه کې خپلې چارې پرمخ وړي.

د سیاسي چارو شنونکي وايي،انديښنه داده،که د ياد سازمان اړوند ټولې ادارې په افغانستان کې وتړل شي،نو د فقر او بیکارۍ ترڅنګ بشري ناورین رامنځته کيدلای شي.

دغه راز دوی وايي، د اسلامي امارت له لورې پر زده کړو بنديز نه  یوازې افغان ملت له حکومت لرې کوي،بلکې افغانستان له نړيوالې ټولنې منزوي کولی شي.

پنځه ورځ وړاندې اقتصاد وزارت د ځانګړې مکتوب په صادرولو سره هېواد کې په ټولو انجينو ګانو  کې د ښځينه کارکوونکو په کاري فعاليت بنديز ولګوه،چې ياده پريکړه د څو ورځو تیريدو وروسته لاهم په کور دننه او بهر له تندو غبرګونو سره مخ ده.