ټاکل شوې ده چې د ملګرو ملتونو امنيت شورا نن دوشنبه د افغانستان وضعيت ارزولو په موخه ناسته وکړي.
په دې ناسته کې به د امنيت شورا غړيو هېوادونو پر استازو سربېره د ملګرو ملتونو د سرمنشي مرستياله او د دې سازمان د ښځو برخې ریيسه سيما باهوس او په کابل کې د يوناما مشره روزا اوتنبايووا هم ګډون ولري.
امنیت شورا د خبرپاڼې په خپرولو سره ويلي، د ترهګرۍ، په ټولنه کې د افغانستان د ښځو پر مانا لرونکې ونډې او د افغان کډوالو پر وضعیت بحث د يادې ناستې د اجنډا غټ ټکي دي چې د ګډونوالو له لوري به پرې د تړلو دروازو تر شا خبرې وشي.
د ملګرو ملتونو امنیت شورا په دې ویلي: « له دې ناستې وروسته د تړلو دروازو تر شا هم مشورتي غونډه ترسره کېږي او دغه راز به سیما باهوس او ځينې نور ویناوال د افغانستان لپاره د بشپړې ټولنیزې ونډې، برابرۍ او اساسي حقونو غوښتنه وکړي.»
د ملګرو ملتونو امنیت شورا دا هم ويلي، د یوناما مشره به د دوحې بهیر د راتلونکو ګامونو او کاري ډلو د ناستو په تړاو د يادې شوار غړیو هېوادونو استازو سره مالومات شریک کړي.
سرپرست حکومت بيا په ورته ناستو کې د ابهاماتو مخنيوي لپاره د خپل استازي پر موجوديت ټينګار کوي او زياتوي، له دې پرته د افغانستان په اړه کېدونکې ناستې پايله نه شي لرلی.
په قطر کې د اسلامي امارت شارژدافیر سهېل شاهین وايي: « په ټولو هغو ناستو کې د اسلامي امارت د استازو ګډون اړین دی چې په ملګرو ملتونو او نړیواله سطحه جوړېږي او د افغانستان پر مسایلو بحث کوي؛ ترڅو په دې غونډو کې د اسلامي امارت نظر، دریځ او د حل لاره وړاندې شي. په بل صورت کې به دا یوازې ناستې وي، په یو اړخیزه توګه به بحثونه کوي او واقعي حل لاره به نه شي موندلی.»
د سایسي چارو شنونکي هم د سرپرست حکومت له دې دريځ سره موافق دي او وړانديز کوي، که نړیوال غواړي د افغانستان په تړاو ناستې يې پايله ولري، ښه ده چې د اسلامي امارت استازی ور وبولي.
د نړیوالو اړیکو شنونکی سمیر انګار وايي: « د افغانستان د رسمي استازي له حضور پرته د افغناستان د ستونزې په اړه د ملګرو ملتونو امینت شورا ناسته، مشروعیت او ځانګړی اغېز نه لري. ځکه چې د افغانستان د خلکو غږ نه اورېدل کېږي.»
د سیاسي چارو شنونکی ادریس محمدي ځاځی وايي: « په ټولو مسایلو باید بحث وشي، له دغو مشکلاتو سره د مبارزې لپاره څلور کاله کافي وخت و؛ له دې وروسته باید خبرې د تعامل او رسمیت پېژندنې په اړه وي او د افغانستان په داخل کې ۴۰ میلیونه نفوس لپاره خوشاله او سوکاله ژوند آماده کړي.»
دا په داسې حال کې ده چې ځینې نور بيا د دې برعکس باور لري چې سرپرست حکومت د افغان ولس او نړيوالو د مشروع غوښتنو په منلو سره، په نړيوال سټېج او نړيواله کچه د افغانستان په اړه کېدونکو بحثونو کې ځان ته ځای پيدا کړي.
د پوځي چارو شنونکی اسدالله ندیم وايي: « د ښځو د کار، د نجونو د ښوونې روزنې او زده کړو ستونزه د ملګرو ملتونو امنیت شورا په کاري اجنډا کې ځای لري. دا د افغانستان لپاره ګټوره ده، ځکه چې افغانستان تل د ملګرو ملتونو له مرستو برخمن دی.»
د نړیوالو اړیکو شنونکی نجیب الرحمن شمال وايي: « باید د شته ستونزو او ننګونو د رفع کولو لپاره عملي ګامونه پورته کړي؛ ځکه چې د ملګرو ملتونو له ملاتړ پرته له دغو ستونزو او په ځانګړې توګه د ښځو او نجونو په تړاو له شته ننګونو وتل ناشوني دي.»
ټاکل شوې د جون پر ۳۰ مه او د جولای په لومړۍ هم د دوحې بهیر اړوند د ملګرو ملتونو دوې کاري ډلې ناسته وکړي او په کې به د نشه یي توکو پر ضد پر مبارزې او د خصوصي سکټور پر پياوړتیا تمرکز وشي.
شاوخوا درې میاشتې وړاندې د ملګرو ملتونو امنيت شورا ناسته کړې وه چې په پایله کې يې د یوناما ماموریت د ۲۰۲۶ زېږدیز کال د مارچ تر ۱۷مې نېټې وغځول شو.
